Хаалһ һатлһна һазриг ясрулв

08-06-2020, 19:17 | Таңһчин зәңгс » Эндрк ґдрин тґрір

«Каспий» УПДОР ФКУ-н көдләчнр таңһчар давҗ һардг федеральн хаалһст көдлмш кеҗәнә. Энтн Яшкуль селәнә өөр «Әәдрхн-Элст-Сарпуль» Р-216 гидг көлгн-күчнә федеральн хаалһд йовһн әмтн һатллһна 4 ормин кец-таалынь ясрулсмн. Дәкәд болхла «Каспий» Р-22 гидг көлгнә хаалһд Ергенинский селәнә өөр-шидр йовһн улс һатллһна һазриг ясҗ шинрүлсн болдг.
Хаалһд докья өгдг светоформуд, «Йовһн улсин Һатллһн» болн «Бичкдүд» гидг хаалһин темдгүд углҗ тәвсмн. Тер мет йовһн улс хаалһиг һатлдг ормиг светодиодн шамар болн төмр хашаһар теткв. Хаалһин темдгүд өдгә цагин сән чинртә болн бат материалар кегдсмн. Шамин герл һатллһна ормд тусна. Тегәд чигн җолачнр холас һатллһна һазриг үзҗ чадна. Тер мет проектормудын нилчәр хаалһин темдгүд будта, хурта-чиигтә өдрәр, харңһу сөөһәр чигн сәәнәр үзгднә.
Хаалһин тосхачнр йовһн улс һатллһна ормсиг ясрулсн деерән нань чигн зүсн-зүүл көдлмш кеҗәнә. Федеральн хаалһст зеткр болн әәмшгтә йовдл учрдг, хаалһин социальн чинртә участкс ясрулҗана. Эн җил төгстл 6,8 шаху дуунад хаалһиг әәмшгтә һазрас халхлҗах төмр хашас тәвгдх. Тер мет хаалһст утдан 113,6 дуунад 7100 катафот тәвгдв. Цуг эн кесн тоот хаалһин җисәнә әәмшг уга бәәдлиг өөдлүллһнд болн зеткртә йовдлмудыг баһруллһнд туслхнь маһд уга.

Мана зәңгч

#Упрдор #ДорогиКалмыкия #Калмыкия08 #ФедеральныеДороги #Каспий

Видео