Элстд шин гер тосхгдх

02-07-2020, 18:06 | Таңһчин зәңгс » Эндрк ґдрин тґрір

2019-ч җиләс авн мана орн-нутгт әмтиг хуучн, эвдркә гермүдәс нүүлһлһнә көтлвр шинәс экләд үүлдҗәнә. Урднь иим көтлвр бас 2013-2017-ч җилмүдт күцәгдсмн.
2017-ч җил эклтл нурҗах гер-бүүр гиҗ тоолгдсн гермүд эн көтлврт орсн болдг. «Гер-бүүр болн балһсна бәәдл» гидг келн-улсин төсв тавн җилин туршарт үүлдхмн. Эн төсвин йовудт әмтиг нурҗах гермүдәс нүүлһлһнә көтлвр бәәдл-җирһлд тохрагдҗана.
Мана таңһчд бас эн төсв күцәгдҗәнә. Нидн әмтиг хуучн гер-бүүрәс нүүлһлһнә көтлврин йовудт Элст балһсна 3-ч микрорайонд эвдркә олн давхр герәс әмтиг девсң-девсңгәр нүүлһәд, шин бүүрәр тетксмн. Давсн җилд эн герт бәәсн кесг өрк-бүлмүдт шин патьр хулдҗ өгсмн.
Эн җил әмтиг хуучн, эвдркә гер-бүүрәс нүүлһлһнә көтлвриг күцәлһнә йовудт Элстд, Некрасовин уульнцд 26 патьрта шин гер экләд тосхгдх. Цуг белдврин көдлмш төгсәгдв. Төсвин-тооцана цаасинь белдәд, шаңһа шинҗллт кегдв. Удлго герин тосхлт эклх. Тосхлтын көдлмшиг зуралсн болзгас урд дуусхар бәәнә. Эн җил төгстл шин гер эдлврт орулгдх. Тиигхлә 26 өрк-бүл шин бүүртән орхмн. Элст балһсна администрацин барин зәңглсәр, дарук җилд хотл балһснд дәкәд нег шин гер тосхҗ, балһсна чеерүдт темдглҗ бичгдсн льготн багин улс шин патьрар теткгдхмн.
Темдглхд, тавн җилд үүлдх хуучн, эвдркә гер-бүүрәс нүүлһлһнә көтлврин йовудт таңһчд 11 олн давхр герәс әмтн нүүлһгдәд, шин бүүртә болхмн. Элстәс нань Лаганя, Үстин болн Яшкулин райодт хуучн гермүдин әмтн шин патьрар теткгдх.

АРЗАН Амулң

Видео