Амрдг һазриг ясрулҗана

15-07-2020, 11:35 | Таңһчин зәңгс » Эндрк ґдрин тґрір

Баһ Дөрвдә селән «Гер-бүүр болн балһсна бәәдл» гидг келн-улсин төсвин «Сән кец-таалта балһсна бәәдл тогталһн» гидг федеральн төсвд орлцҗана.
Эн цутхлң селәнд олн улс амрлһна һазриг ясруллһна көдлмш гүргүдән орв. Энд паркин бәәдлиг ясрулҗ, тосхлтын көдлмш күцәҗәнә. Эн өдрмүдт һазрт тротуарн плитк делгҗәнә, герл өгдг панрмуд углҗ тәвҗәнә. Тер мет паркиг хашалһҗ, бичкдүдин талвң болн фонтан тосхлһна һазриг белдхмн.
«Паркин бәәдл таньгдшгоһар хүврхмн. Урднь парк үзмҗ уга билә. Тегәд чигн удлго энд амрлһна төлә таалмҗта бәәдл тогтагдх гиснд селәнә әмтн ик гидгәр байрлҗана. Өөрхн иргчд бәәрн улс сән кец-таалта паркд өрк-бүләрн амрч, сул цаган айта гидгәр давулҗ чадхмн», - гиҗ Баһ Дөрвдә СМО-н толһач Евгений Эрдниев темдглв.
Эн җилин туула сард иргчдән паркин бәәдл ямаран болхин туст ухан-тоолвран медүлҗ, баһ дөрвдәхн бийснь шиидвр авв. Тегәд чигн бәәрн әмтн дууһан өглһнә ашар паркин дизайн-төсв йилһҗ авсмн. «Хулһн сарин 1 күртл тосхлтын организац көдлмшән дуусх. Намртан Баһ Дөрвд селәнд амрлһна сән-сәәхн орм бүрдәгдх», - гиҗ СМО-н толһач келв.
Эн җил таңһчд «Гер-бүүр» гидг келн-улсин төсвин «Сән кец-таалта балһсна бәәдл тогталһн» гидг федеральн төсвиг күцәлһнә йовудт олн улс амрлһна нәәмн ормиг ясрулхмн. Эннь Приютна района Воробьевка селәнд, Ик Царң, Көтчнр, Баһ Дөрвд, Яшкуль, Садовое цутхлң селәдт, Лаганьд болн Элст балһсдт әмтн амрч, сул цаган сергмҗтәһәр давулҗ чадхмн.
Федеральн төсвин нилчәр таңһчин хотл балһсна болн райодын парксин болн сквермүдин бәәдлинь ясрулҗана, тер мет түрүн болҗ бичкн селәдин чигн әмтнә төлә амрлһна ормс бүрдәҗәнә.

АРЗАН Маргарита

Видео