Мана арһлачнр таңһчин нер харсх

17-08-2020, 16:49 | Таңһчин зәңгс » Марєан

Шидр «Хальмгин сән гисн эд-тавр» гидг таңһчин марһана аш диглгдв. Эн марһан хальмг арһлачнрин эд-таврин болн хот-хоолын чинр өөдлүлхин, теднә тускар олн әмтн медхин төлә зарлгдсмн.
Марһан арвн һурвн номинацар давулгдв. Болв бәәрн арһлачнр нурһлҗ «Хот-хол», «Сурһуль-эрдмин болн спортын халхар күргҗәх туслмҗ» болн «Промышленн эд-тавр» гидг номинацст шунмһаһар орлцв. Марһана ашар бод мал өскдг болн махна зүүтә хот-хол кедг Хар Һазра «Первомайский» эдл-аху, өгрсн шаврар кегдлмүд кеҗ һарһдг арһлач Мария Кнурева болн негдсн багмудын спортивн белдврин таңһчин төв дииләчнр болв. Хальмг Таңһчин экономикин болн хулд-гүүлгәнә министр Дмитрий Троицкий эднд ачлвринь бәрүлҗ өгв. Тер мет марһана бүрдәһәчнрин шиидврәр мана таңһчд кегдлмүднь олн әмтн дунд тааслт олсн арһлачнр дипломантнр болв. Эннь һуйрин зүүтә кегдлмүд кеҗ һарһдг арһлач Эрднь-Һәрән Оксана, махна зүүтә хот-хол кедг арһлач Ивана Савр, махна болн һуйрин зүүтә хот-хол кедг арһлач Максимә Бембә болв.
- Эн җил баһ болн дунд бизнесин төлә йир күнд болв. Орн-нутгин правительств арһлачнриг дөңнхин туст кесг керг-үүлдвр батлсн бәәнә. Тиигәд, алвна болн даатхлһна мөңгән өглһнә туст, өгъялҗ авсн мөңгән даңцалһна туст сән таал тогтагдв, кергән хадһлҗ цааранднь делгрүлхин туст шаңһас дем өггдҗәнә. Эн марһан бас тана үүлдвриг шунмһадулхин болн урмдулхин төлә бүрдәгдв. «Мини керг» гидг таңһчин төвд арһлачнрт цуг халхар дөң күргҗ, ямр нег төр хаһллһнд сүв-селвгән өгнә. Бидн таднла харһҗ, таниг үүмүлҗәх төрмүдиг хамдан хаһлхдан бас белн бәәнәвидн, – гиҗ министр келв.
Марһана лауреатнрт болн дипломантнрт таңһчин экономикин министерствин, Астраханск мүҗд болн Хальмг Таңһчд стандартизацин, метрологин болн шинҗллтин региональн төвин белгүд бәрүлҗ өггдв. Темдглхәс, марһанд диилвр бәрсн арһлачнр эврәннь эд-таврт болн эдл-уушд «Хальмгин сән гисн эд-тавр» гидг темдг олзлҗ чадҗана. Дәкәд эн арһлачнр эврәннь эдл-уушан «Әрәсән сән гисн 100 эд-тавр» гидг марһанд йовулх зөв авв.

БАТАН Наталья
ЗУРГТ: таңһчин экономикин министр Дмитрий Троицкий марһанд диилвр бәрсн арһлачнрла

Видео