Хальмг седкүлчин үүдәгч күцәмҗ

Нижний Новгород балһснд шидр Нарт-делкән телекинон V хург көдлмшән төгсәв. «Новая реальность - 2026» гиҗ нерәдгдсн эн аһу ик кемҗәтә керг-үүлдвриг Әрәсән седкүлчнрин Ниицән бүрдәсмн. Әрәсән телекинон хургин лауреатнр дунд хальмг седкүлч Мукөвүнә Цаһана көдлмш темдглгдв.
Телеүзлин болн кинон халхар үүлдҗәдг олн билгтнр терүнд орлцв. Әрәсән олн һазадын нутгудын үүлдәчнр үүдәврмүдән үзүлв. Орн-нутгин 46 регионас 57 телекомпань хургин көдлмшт орлцсинь заахмн. Марһана дииләчнриг ачллһна байрин керг- үүлдврт Әрәсән седкүлчнрин Ниицәнә ахлач Владимир Соловьев йөрәлин үг келв. Энд цуглрсн седкүлчнриг сойлын болн олна үүлдәчнриг Нижегородск мүҗин губернаторин дарук Андрей Гнеушев үнн седкләсн бас йөрәв.
Марһана лауреатнр дунд Хальмгин келн-улсин телеүзлд көдлҗәдг Мукөвүнә Цаһан бас ачлгдв. «Келн -улсин келәр белдсн хамгин сән соңсхвр» гидг әңгд «Теегин иньг» гидг телефильм белдсндән хальмг седкүлч дипломар мөрәлгдв. Хальмгин һазрт хөв-кишгән олад, иҗлдәд, селәнә әмтнлә нег җирһләр бәәһәд, хальмг кел дасад, урһа модд тәрҗ ирсн һазран кеерүлсн улсин туск көдлмш олна оньг авлв. Төрскн һазртан итклтә эн өрк-бүлин тууҗ орн-нутгин тууҗла залһлдата.
«Әрәсән олн келәр соңсхврмудан белддг редакцсин көдлмшлә таньлдад, Әрәсән «олн ду» соңсвидн, - гиҗ Мукөвүнә Цаһан келнә. – Олн келнә дүүрәнд республик болһн эврә өвәрц дууһарн ончрна. Терүнднь Әрәсән күчн бәәнә».
Хургин йовудт олн зүсн регионас ирсн седкүлчнрлә күүндвр кеҗ, Мукөвүнә Цаһан кесг соңсхвр белдв.
«Теегин иньг» гидг фильмиг шевнрәхн таасч хәләв. Ода тиигәд Мукөвүнә Цаһана цокч авсн фильм Әрәсән тууҗд күн болһна җирһл үнтә болдгиг, ямаран чигн күнд цагт улсин хоорндк иньгллт урмд өгч кен-негнднь туслдгинь медүлҗәнә.
УШКАНА Сувсн