Өнр-өсклң Улановихн – Әрәсән сән гисн өрк-бүл

24-08-2020, 16:53 | Таңһчин зәңгс » Марєан

Шидр Хальмг Таңһчин социальн делгрлтин, күч-көлснә болн көдлмшәр тетклһнә министерств өнр-өсклң Улановихн «Эн жилин Әрәсән сән гисн өрк-бүл» гидг марһанд «Олн үртә өрк-бүл» гидг номинацд диилвр бәрснә тускар зәңглв. Эн җил Цугәрәсән марһанд 89 өрк-бүл дииләчнрин тоод орв. Марһанд ут тоодан 3 миңһн һар өрк-бүл Әрәсән цуг регионмудас орлцв. Өрк-бүлин тускар келгдҗәх портфолио марһана экспертмүд үнлҗ, эдн региона бәәдл-җирһлд шунмһаһар орлцдгинь учртан авч дииләчнриг йилһҗ авсмн. Эн марһан Әрәсән күч-көлснә болн социальн харслтын министерствин болн җирһлин күнд таалд туссн бичкдүдиг дөңнлһнә саңгин седвәрәр мана орн-нутгт тавн җилд дарандан давулгдҗана. Эн җил марһан түрүн болҗ онлайн кевәр давулгдв.
Темдглхәс, мана таңһчин өрк-бүлмүд эн марһанд күцәмҗтәһәр орлцҗ, дииләчнрин тоод эрк биш орна. Тиигәд, Андрюшкеевихнә, Нарин-Шариновихнә, Чужаевихнә, Манджиевихнә өрк-бүлмүд ончрсн билә. Эдн Москва балһснд болсн байрин керг-үүлдврт орлцҗ ачлгдад, билг-эрдмән үзүлсмн. Намртан эпидемиологическ бәәдл сән болхла Улановихнә өрк-бүл бас тиим керг-үүлдврт орлцхмн. Келхд, таңһчин марһанд эдн «Олн үртә өрк-бүлмүд» гидг номинацд ончрад, 50 миңһн арслңга болн таңһчин марһанд диилвр бәрсндән 100 миңһн арслңга сертификатар ачлгдсн билә.
Очр болн Наталья Улановихн тавн үртә, эдн хөр шаху җилдән ни-негн бәәнә. Хойр ууһн үрнь оютнр, хойрнь сурһульчнр, отхн көвүнь дөнтә. Күүкднь биилдг-дуулдг, зурдг, олн зүсн зевсг татдг билгтә. Таңһчин марһанд орлцсн цагтан эдн ду дуулҗ, эврәннь өрк-бүлин тускар видеофильм цоксн билә. Эдн сул цаган хамдан давулхдан дурта, билг-эрдмән делгрүлҗ, үүл бәрҗ сергмҗтәһәр амрна. Эднә өрк-бүлд хальмг болн солңһс келн-улсин авъяс, сойл хадһлҗ, бичкдүдән өкәрлҗ, ах улсиг тевчҗ бәәнә. Эк-эцкнь үрдтән үлгүр-үзмҗ болҗ, тедндән чик сурһмҗ өгхәр шунна.
Наталья берин келсәр, эдн түрүн болҗ Цугәрәсән марһанд орлцҗана. Тегәд терүнд олн үртә өрк-бүлмүд дунд диилвр бәрснь эднд ик байр үүдәв. Эн марһанд орлцхин төлә цокҗ авсн фильмд эдн бийиннь тускар медүлҗ күүкдтәһән олн зүсн марһаст орлцхдан дуртаг келсн билә. Ямр нег керг-үүлдврт белдсн цагтан эдн нег-негндән нөкд болҗ, хамдан билг-эрдмән делгрүлҗ үүлднә. Иим марһас өрк-бүлиг ниилүлҗ батрулна гиҗ олн үртә Наталья тоолна.
Хальмг Таңһчин социальн делгрлтин, күч-көлснә болн көдлмшәр тетклһнә министр Өлзәтин Марина диилвр бәрсн Улановихнә өнр-өсклң өрк-бүлиг цаһан седкләсн йөрәҗ, эднд хөв-кишг эдлхиг дурдв. «Мана таңһчин өрк-бүлмүд Цугәрәсән марһанд орлцад, ик күцәмҗ бәрҗәхнь байрта йовдл болҗана. Эдн эврәннь үлгүрәрн, дамшлтарн болн күцәмҗәрн бат өрк-бүлин чинриг өөдлүлҗ талдан улст седвәртәһәр үүлдхд урмд өгнә», – гиҗ Марина Петровна темдглв.
Цугәрәсән марһана ашар шишлң дегтр барлгдхмн, тер хойр әңгәс тогтх. Түрүн әңгднь диилвр бәрсн өрк-бүлмүдин тууҗс орх, хойрдгч әңгднь болхла марһанд орлцачнрин тускар барлгдхмн. Тавдгч һарцд дәкәд нег хальмг өрк-бүлин тускар келгдхнь ончта болҗана.

ДООҖАН Наталья

Видео