Олна дөңгәр сурһульднь белдв

01-09-2020, 15:22 | Таңһчин зәңгс » Эндрк ґдрин тґрір

Хальмг Таңһчин социальн делгрлтин, күч-көлснә болн көдлмшәр тетклһнә министерствин зәңглсәр, бичкдүдиг сурһульднь белдхд дөң күрглһнә буйнч седклин керг-үүлдврин йовудт 877 миңһн арслң цуглулгдв. Тер мөңгәр 823 сурһульчиг хувцлҗ, канцелярск эд-таврар теткҗ, сурһульднь кергтә тоот хулдҗ авв. Таңһчин предприять-бүрдәцс, арһлачнр, селәнә эдл-ахус, селәдин муниципальн бүрдәцс, буйнч секдлтә улс эн кергт демән күргв.
Таңһчин әмтнә социальн теткврин комплексн төвмүдин көдләчнр эн буйнч седклин кергиг бүрдәҗ, олн үртә, баһ тетквртә болн җирһлин күнд таалд туссн бичкдүдиг сурһульднь кергтә тоотар теткв. Пандемий учрсн цагт хаврар сурһульчнр алс-зәәһин кевәр сурсн билә. Тер цагт кесгнь шишлң эв-арһс уга болад, кичәлд орлцҗ чадсн уга. Хар Һазра района Первомайский эдл-аху Адг селәнә бичкдүдт 11 планшет хулдҗ авлһнд 55 миңһн арслң йилһв.
Җил болһн бүрдәгддг эн керг-үүлдвр сән авъяст тохрв. Терүнд олн җилин эргцд демән күргҗәх бүрдәцс дунд таңһчин мөшклһнә комитетин, зарһин приставмудын цергллтин көдләчнр бәәнә, эдн баһ тетквртә бичкдүдт дөң күрглһнд шунмһаһар орлцна. Эн җил арһлач Светлана Гузь түрүн болҗ сурһульд орх бичкдүдт ке-сәәхн башмг йилһҗ өгв. Олна дөңгәр кесг өрк-бүлд эндрк күнд цагла дөң күрггдснь буйнч седклтә улс мадн дунд олн бәәхиг герчлв.

БАТАН Наталья
ЗУРГТ: мөшклһнә комитетин көдләчнр буйнч седклин кергт орлцҗах кем

Видео