Хальмг цә болн күр гиичнрт таасгдв

08-09-2020, 14:43 | Таңһчин зәңгс » Эндрк ґдрин тґрір

«Әәрм-2020» гидг цергә-техническ нарт делкән форум шидр төгсв. Московск мүҗин Одинцовск района «Патриот» гидг һәәхүлин төвд, Кубинка гидг аэродромд болн Алабино гидг полигонд болсн чинртә керг-үүлдврт Әрәсән бәәтхә, 90 һазадын орн-нутгин команд орлцсн билә. Эн керг-үүлдвр секлһнд нерәдгдсн байрт Хальмг Таңһчин Толһач Хаска Бату орлцсн билә. Темдглхәс, Хальмг Таңһч терүнд Әрәсән Өмн үзгин федеральн округин нерн деерәс орлцла, мана билгтнр хальмг улсин сойлла таньлдулҗ билг-эрдм үзүлсмн, уйн наста десантникүд бас делегацин ханьд орсмн.
Эн керг-үүлдврт цергә бу-селмин һәәхүл, марһас болсн билә. Сүл өдртнь болхла субъектмүд билг-эрдмин концерт үзүлҗ, сенр хот-хоолын һәәхүл бүрдәв. Мана таңһчин делегац ишкә гер тәвҗ, хальмг улсин нүүдл бәәдл-җирһлин тускар олн гиичнрт келҗ өгв. Тер мет хальмг улсин сенр олн зүсн хот-хол белдҗ, әмтиг тоов. Әрәсән харслтын министр Сергей Шойгу Хальмг Таңһчин һәәхүл ирҗ хәләв. Келхәс, дааврта һардач мана һәәхүлиг соньмсҗ хәләҗ, олн сурвр өгч, ямаран хот-хол белдсиг сурв. Хальмг улс нүүҗ йовсн цагтан һазр малтад бүкл хөөнә махиг болһдг бәәсиг эн оньгтаһар соңсҗ, цергә улс удан цагтан даалһвр күцәҗ кеер йовхларн бас тиим хот белдҗ чадхиг темдглв. Сергей Кужугетович хальмг мах болн цә амсад, йир шимтә болн сенр хот гиҗ таасҗ буульв. Дәкәд эн һәәхүлд Хар Һазра района «Первомайск» эдл-ахуд кеҗ һарһдг махна зүүтә хот-хол үзүлгдсмн. Әәрмд церглҗәх улст эн махн йир тааста болхнь лавта. Эн һәәхүлин хөөн мана эдл-аху әәрмиг эврәннь эдл-уушар тетклһнә төр хаһлгдх чигн биз.
Шидр социальн сетьд нег бер бичкн көвүндән ааһд хальмг цә өгчәх видео барлгдв. Эн бер хойр үртәһән цергә-техническ форумд орлцхар ирсмн. Хальмг Таңһчин һәәхүлд эдниг хальмг цәәһәр тооснь медгдв. Тегәд тер бичкн көвүн экнь ааһинь авхар седхлә, цәәг чиләҗ уутлан ааһан һарасн тәвсн уга. Орс бичкн көвүнд хальмг цә йир таасгдв гиҗ экнь келснд мана делегацин ханьд орсн улс терүг яһҗ болһдгиг зааҗ өгв. Хальмг цә уухла, нань хот керглгдшго гиҗ тедн келәд, көвүн йоста залу гиҗ буульв.

ДООҖАН Наталья
ЗУРГТ: Хальмг Таңһчин һәәхүл олн гиичнриг соньмсулв

Видео