Хальмгин элчнр – дииләчнрин тоод

11-09-2020, 13:53 | Таңһчин зәңгс » Марєан

Одахн «Әрәсән нүүрләчнр» гидг марһан төгсв. Терүнд орлцсн 230 миңһн күүнәс дииләчнр йилһҗ авгдв. Суперфиналд орлцсн һурвн зун күүнәс 33-нь Әрәсән Өмн үзгин элчнр билә. Марһанд диилвр бәрсн сән гисн болн седвәртә улсас 106 дииләч йилһҗ авгдсмн, тедн дунд Хальмг Таңһчас хойр күн бәәхнь байрта йовдл болв. Чиҗин Андрей болн Картин Андрей эн марһанд диилвр бәрәд, 1 сай арслңга грант шүүҗ авв. Эдн терүг РАНХиГС-ин шаңһа залврин Деед школд сурһуль сурлһнд олзлхар шиидв.
Эн баахн улс урднь Хальмг Таңһчд гемтә-шалтгта бичкдүдин төлә мастер-класс бүрдәсн билә, бичкдүдин үүдәлтин бәәшңд робототехникәр болн театральн искусствар болн нань чигн талдан зөрүллтәр кружокс үүдәсн билә. Эн марһана йовудт эдн олн зүсн төрәр бүрдәгдсн лекцст орлцв, нертә политикүдтә, арһлачнрла харһв. «Әрәсән нүүрләчнр» гидг төсвиг РФ-н Президент бийнь һардна. Эн җил марһанд орлцачнриг Әрәсән правительствин Ахлач Михаил Мишустин болн РФ-н Федерацин Хүүвин Ахлач Валентина Матвиенко йөрәҗ, күцәмҗ бәрхиг дурдсмн.
Таңһчин Толһач Хаска Бату Цугәрәсән марһанд диилвр бәрсн Хальмгин элчнриг йөрәв. «Әрәсән нүүрләчнр» – энтн федеральн кемҗәнд бийиннь тускар медүллһнә төлә сән талвң болна. Терүнд орлцлһн байн дамшлт, делгрлт, седвәртә болн шунмһа улсла харһҗ, нертә болн нүүрлгч политикүдлә, арһлачнрла күүндх арһ өгдг марһан болҗана. Җил болһн мана таңһчин элчнр улм сән күцәмҗ бәрҗ йовна. Түрүн болҗ мана хойр элч суперфиналд һарв. Ирх җилд мадниг эрк биш диилвр күләҗәнә», – гиҗ Бату Сергеевич темдглв.

БАТАН Наталья

Видео