«Алтн үзг» Марһанд орлцад

22-09-2020, 14:00 | Таңһчин зәңгс » Марєан

Ик Буурла района әмтнә социальн теткврин комплексн төвин (КЦСОН) һардач Самхан Светлана «2020 җилин Әрәсән социальн цергллтин «Алтн үзг» гидг Цугәрәсән марһана лауреат болв. Эн марһан «Социальн цергллтин көдләчнрин Ассоциац» гидг олна бүрдәцин седвәрәр «Социальн тетквр» гидг барин һарцла хамдан давулгдв. Марһан 26 номинацар давулгдсн билә, терүнд орлцачнрин статьяс «Социальн тетквр» болн «Социальн цергллтин көдләч» гидг седкүлд барлгдхмн.
Эн марһанд мана орн-нутгин булң болһнас 1200 статья илгәгдв. Теднәснь 300 түүрвәч марһана лауреатын нер зүүв. Ик Буурла КЦСОН «Социальн теткврин учрежденьс: келн-улсин төсв күцәлһнд тәвц оруллһн» гидг номинацд темдглгдв. Светлана Владимировна Ик Буурла района социальн теткврин комплексн төв «Демографь» гидг келн-улсин төсвин медлд «Ах үй» гидг региональн көтлврин халхар күцәсн керг-үүлдврмүдин тускар бичсмн. Комплексн төв нидн «Демографь» гидг келн-улсин төсвәр шишлң көлгәр теткгдсн билә. Терүгәр эдн района эрүл-менд харлһна көдләчнрлә хамдан селәдәр йовҗ, 65 нас һарсн медәтнрт дөң күргнә. Дәкәд ниднәс авн КЦСОН-д «Девясил» гидг эрүл-мендин клуб үүлдҗәнә. Терүнд ах үйин улс эрүл-мендән батрулҗ, чик авг-бәрцәр бәәнә. Долан хонгт хойр дәкҗ медәтнр эн клубд болдг занятьст орлцна. Эн келн-улсин төсвәр күцәгдҗәх керг-үүлдврмүдин тускар Светлана Владимировна тодрхаһар бичәд, Цугәрәсән марһанд орлцсмн. Эднә үүлдвриг өөдәнәр үнлҗ, социальн цергллтин «Алтн үзг» гидг марһана лауреатын нер зүүснь района комплексн төвин көдләчнрин күцәмҗ болҗана.
Самхан Светлана Ик Буурла района әмтнә социальн теткврин комплексн төвд 2006 җиләс авн көдлҗәнә, арвн хойр җилдән терүг һардҗана. Чадмг һардачин һардврт района әмтнд социальн туслмҗ күрглһнә, баһ тетквртә болн җирһлин күнд таалд туссн улсиг дөңнлһнә көдлмш дигтә-даратаһар күцәгдҗәнә.
Хальмг Таңһчин социальн делгрлтин, күч-көлснә болн көдлмшәр тетклһнә министерств Самхан Светланаг болн төвин цуг көдләчнриг байрта йовдлла йөрәҗ, көдлмшән үнн - чик седклтәһәр күцәдг төләднь ханлтан өргв. Эн төвин көдләчнр олн зүсн керг-үүлдврт орлцҗ дамшлтарн хувалцна, таңһчин болн Цугәрәсән марһаст ачлвр авна гиҗ министерствд темдглв.

БАТАН Наталья

Видео