Өрк-бүлмүдин марһана тускар

29-09-2020, 15:01 | Таңһчин зәңгс » Марєан

«Җилин сән гисн өрк-бүл» гидг Цугәрәсән марһана бүрдәмҗин комитет 2020 җилин ашиг диглҗ, эн марһана региональн девсң өөдән кемҗәнд бүрдәгддг регионмудыг заав. Тиигәд, темдглсн арвн региона тоод Хальмг Таңһч бас орснь байрта. Эн марһаг Әрәсән күч-көлснә болн социальн харслтын Министерств җирһлин күнд таалд туссн бичкдүдиг дөңнлһнә Саңла хамдан давулна. Терүг регионмудт бүрдәҗ давуллһна кергиг йосна органмуд күцәнә. Мана таңһчд марһана региональн девсңгиг социальн делгрлтин, күч-көлснә болн көдлмшәр тетклһнә министерств давулна.
Эн җил санитарн-эпидемиологическ бәәдләс иштә Әрәсән кесг субьектд эн марһан давуллһнд сольвр орулгдв. Хальмг Таңһчд эн дистанционн эв-арһар давулгдснь Цугәрәсән марһана региональн девсңгүд бүрдәлһнә сән гисн дамшлтын тоод орв. Әрәсән күч-көлснә болн социальн харслтын министрин негдгч дарук Алексей Вовченко мана таңһчд эн марһан өөдән кемҗәнд бүрдәгдснд ханлтан өргҗ, эн керг-үүлдвриг 2021 җилд давуллһна халхд цааранднь чигн хамцу үүлдхвидн гиҗ ицҗәхән медүлв.
Таңһчин социальн делгрлтин министерств эн марһанд орлцсн өрк-бүлмүдт ханлтан өргҗ, цугтаднь хөв-кишг дурдв. Министр Өлзәтин Маринан темдглсәр, мана таңһчин өрк-бүлмүд тавн җил дарандан эн марһанд дииләчнрин тоод орв. Тиигәд, Андрюшкеевихн, Нарин-Шариновихн, Чужаевихн, Манджиевихн болн Улановихн Әрәсән сән гисн өрк-бүлмүдин нер зүүсмн.

БАТАН Наталья

Видео