Көдләчнрин күч-көлс харна

09-10-2020, 16:24 | Таңһчин зәңгс » Марєан

Хальмг Таңһчин социальн делгрлтин, күч-көлснә болн көдлмшәр тетклһнә министерствин зәңглсәр, «Күч-көлс харлһна сән гисн специалист» гидг таңһчин марһана аш диглгдв. Эн марһан мана таңһчд җил болһн 2013 җиләс авн Хальмг Таңһчин залврин тогтаврас иштә давулгдна. Эн таңһчин бүрдәцст көдләчнрин төлә сән таал тогталһна, эднә эрүл-менд батруллһна, күч-көлс харлһна төрмүд хаһлгдхин төлә бүрдәгднә.
Эн җил марһана ашар Городовиковск района «Комсомолец» ООО-н күч-көлс харлһна инженер Сергей Мишкин диилвр бәрв. Эн ниицән мана таңһчин селәнә эдл-ахун халхд олн җилин эргцд олзта-тустаһар үүлдҗ йовна. Энд көдләчнрт әәмшг уга бәәдл тетклһнд, эднә эрүл-менд батруллһнд ик оньг өггднә. Тегәд эн эдл-ахун күч-көлс харлһна инженер дииләч болснь темдгтә. Әрәсән пенсионн саңгин Хальмг Таңһчар үүлддг әңгин нүүрлгч мергҗлт - күч-көлс харлһна эксперт Сергей Долгих 2-ч орм эзлв. Элст балһсна 19-ч тойгта «Тюльпанчик» бичкдүдин садын күч-көлс харлһна көдләч Бурумбан Галина 3-ч ормд һарв.
Эпидемиологическ нәрн бәәдләс иштә марһанд дииләчнриг санитарн некврлә ирлцәтәһәр ачлв. Эднд Хальмг Таңһчин социальн делгрлтин, күч-көлснә болн көдлмшәр тетклһнә министерствин Күндллһнә һашг болн үнтә белг бәрүлҗ өггдв.

ДООЉАН Наталья
ЗУРГТ: күч-көлс харлһна сән гисн мергҗлт Сергей Мишкин

Видео