Йөрәл

27-10-2020, 09:18 | Таңһчин зәңгс » Бурхн-шаҗна төрәр

Эндр, хулһн сарин 27-д, Хальмг Таңһчин Шаҗн лам Тэло Тулку ринпочен һарсн өдр билә. Тегәд “Хальмг үнн” редакцин, эңкр мана умшачнрин нерн деерәс һарсн өдрлә Дилав ринпочег йөрәҗәнәвидн!

Байн буй хурасн,
Оюна зөөр хурасн,
Эңкр күндтә Шаҗн Лам
Дилав Ринпоче!
Эн сәәхн өдрин байрла,
Әрүн цаһан седкләсн
Таниг йөрәҗәнәвидн!
Оньдин дөрвн цагт,
Оньдин дөрвн үзгт,
Өөрдин заңгар,
Өвкнрин авъясар,
Нарт-делкә деер
Бурхн Багшин номин герл делгрүлҗ,
Көкргч теңгр дор,
Көрстә һазр деер,
Мөңкинд ут нас наслҗ,
Бат җирһлтә болҗ,
Арвн цаһань делгрҗ,
Арвн харнь буйсҗ,
Зовх зовлң уга,
Зем-гем уга,
Үрглҗдән байрта-бахта
Амулң-менд бәәхитн
Олн Деед Бурхд
Өршәҗ таниг хәәрлтхә!

Видео