Найнтахна улсин седвәр

10-11-2020, 15:05 | Таңһчин зәңгс » Селәнә эдл-аху

Целинн района «Шин җирһл» газетд Найнтахн селәнә бәәрн улсин буйнч седклин керг-үүлдврин тускар келгдҗәнә. Шидр эдн «Чини цевр Хальмг» гидг таңһчин субботник болхас урд селәһән хог-богас ахулсн деерән күч-көлснә ветеран Зинаида Дорджиевна Манджиевад гериннь һаза шин хаша-хаац тосхв. Эн кергиг эдн Алдр Диилврин 75 җилин өөнд нерәдҗ медәтин ач-тус темдглхәр күцәв.
Манҗин Зинаида селәндән тоомсрта, олна күндлһ олсн медәт болна. Насн-җирһлиннь туршарт эн үнн-чик седклтәһәр көдләд, төрскн һазриннь делгрлт тәвцән орулсмн. Тегәд ветерана герин һаза хаац тосхлһна кергиг селәнә бәәрн улс цуһар дөңнҗ дөң-тусан күргв. Найнтахн селәнә муниципальн бүрдәцин администрац әмтнә сән седвәриг дөңнәд, кергтә тосхлтын материалмуд хулдҗ авлһнд мөңг йилһв. СМО-н толһач Күңкрә Басң селәнә тосхачнрла күүндәд, ямаран материал хулдҗ авхла сән болхиг селвлцәд, цуг кергтә тоот хулдҗ авв.
Селәнә әмтн эврә сән дурар Зинаида Дорджиевнад хаша-хаац тосхх санаһан медүлҗ, дарунь көдлмшиг эклв. Лиҗин Баатр, Хулхачин Стас, Власовин Виктор, Бембин Валерий, Хардан Виктор болн Лиҗин Валерий дарунь шин хаац тосхҗ, көдлмшән цөөкн өдрин эргцд дарунь дуусв. Медәт нег һазра улст зүркни ханлтан өргҗ, ах үйд иим килмҗ тусхасиг өөдәнәр үнлв. Тиигәд селәнә улс күчән негдүләд, эврә сән седвәрәр күч-көлснә ветеранд сән белг белглв.

ДООҖАН Наталья