Нас утдуллһна мөргүлмүд

18-11-2020, 14:58 | Таңһчин зәңгс » Бурхн-шаҗна төрәр

Кезәнә цагас авн хальмгудт нег авъяс бәәнә. Зулын байр эклтл насан утдулдг авъяс мана җирһлд батрсмн. Җил болһн Зулын өмн Хальмгин төв хурлд нас утдуллһна мөргүлмүд кегднә. Эн җил тиим мөргүлмүд үкр сарин 20-д эклҗәнә.
Сарин туршарт амрлһна өдрмүдлә тиим мөргүл кегддгинь цугтан меднә. Әмтн көдлмшәсн сул цагла хурлд ирҗ, өрк-бүлин, элгн-садна насинь утдулна. Эн җил пандемийәс иштә эн мөргүлмүд онлайн янзар кегдҗәнә. Мөргүлмүд амрлһна өдрмүдлә үкр сарин 20-с экләд, бар сарин 6 күртл өрүн 9 часас авн 11.30 час күртл болҗахмн. Төв хурлын сайтд орад цуг кергтә заавриг, кезә, ямаран бурхнла залһлдата мөргүл болхинь медхмн.
Төв хурлын демч лам Йонтен гелңгин келсәр, Бурхн Багшин номд шүтдг әмтн күүнә җирһлин ик үнтә чинринь меднә. Тегәд җирһлән олнд туста үүлдврт нерәдх, әмтнд сә кеҗ бәәдг арһ хәәхин тускар зальврҗ, Зулын байриг тосх зөвтә. Мөргүл болсн цагла зальврад, һанцхн бийиннь сә хәәсн ном умшсн деерән цуг әмтә тоотын сәәһин төлә зальврх кергтә болҗана. Төв хурлын гелңгүд Амитаюс, Ушнишавиджая болн Цаһан Дәркин бурхдт нерәдҗ, ном умшхмн. Ут нас зүүлһнд, амулң менд бәәлһнд туслдг эн бурхдын ном умшгдсн цагт номиг соңсад, дотран зальврад, цуг әмтә тоотын амулң җирһлин төлә мөргх кергтә. Гертән Интернетин дөңгәр номд орҗахдан бичә үүмтн. Ном альд күн эс йоввчн үнн седкләсн зальврхла, туснь эрк биш күрәд бәәдмн.
Иигәд, үкр сарин 20-21-д болн 28-29-д, бар сарин 5-6-д нас утдуллһна мөргүлмүд болхмн.

УШКАНА Сувсн

Видео