Тывад Камбы-лам үүлдән орв

18-11-2020, 15:06 | Таңһчин зәңгс » Бурхн-шаҗна төрәр

Тыва республикин Камбы-лам Гелек Нацык-Доржу үүлдән орлһна барин ик цосрхл Кызылд үкр сарин 22-т улсин үүдәлтин Герт болхмн. Терүнд шаҗна элчнр, йосна үүлдәчнр, шаҗнд шүтдг олн улс орлцхмн. Бурхн Багшин номд шүтдг Әрәсәд бәәх цуг бүрдәцсин элчнр ирҗ орлцх гиҗ күләгдҗәнә.
Тыва республикин шаҗнд шүтдг улсин шин толһач Бурхн Багшин номиг әрүнәр хадһлҗ, шаҗнд шүтдг улсин оюни медрлинь гүүдүллһнд церглхин туск Әрүн андһаран өгхмн. Терүнд бадм цецгин бәәдлтә титм толһаднь залҗ өмскәд, оюни йосна темдгүд бәрүлҗ өгхмн. Байрин ик мөргүл кегдхмн. Дарунь әмтн Камбы-ламд хадг татҗ, күндллһән медүлҗ чадхмн.
Йисдгч Камбы-лам тиигәд үүлдән орҗана.
Терүнә өмн Тыван шаҗнд шүтдг улсиг толһалҗасн нәәмдгч Камбы-лам Джампел Лодой 44-тәдән коронавирус гемәс көлтә сәәһән хәәсмн. 2019-ч җилин үкр сард Джампел Лодой хойрдад Камбы-ламин үүлд суңһгдсн бәәсмн. Цуг делкәд әәмшг үүдәсн гемәс көлтә тиигәд шаҗна үүлдәч сәәни орнд төрв.
Ода үүлд орҗах Гелек Нацык-Доржу эн җилин хулһн сард Камбы-ламин үүлд суңһгдсмн.

ҖИРҺЛИН Кермн

Видео