Бачм бәәдләс гетлхәр

23-11-2020, 15:59 | Таңһчин зәңгс » Эндрк ґдрин тґрір

Шидр Хальмг Таңһчин правительствин Ахлач Юрий Зайцевин һардврт бачм бәәдләс гетлһнә болн уга келһнә, түүмрәс саглуллһна комиссин сүүр болв. Муниципальн, региональн болн федеральн чинртә хаалһст үвлин кемд олн зүсн бачм бәәдл учрсн цагт РСЧС-ин системин эв-арһс белн бәәлһнә болн бәәдл-җирһл тетклһнә объектс дигтә-даратаһар үүлдхин туск төрмүд хәләгдв.
Үкр сарин 17-с авн мана таңһчд цасн икәр орсна ашт региональн болн федеральн чинртә зәрм хаалһст нәрн бәәдл тогтад, кесг көлгн-күчн йовҗ чадлго зогсв. Ода деерән түүмрәс саглуллһна болн әм аврлһна әңгүдин, Госавтоинспекцин, таңһчин эрүл-менд харлһна министерствин, хаалһин организацсин арһ-чидл олзллһн бүрдәгдв.
Керглгдх тосн-түләнә көрңгиг эртәснь тогталһна, «Россети Юга»-«Калмэнерго» әңгин хамдан социальн учрежденьсиг электрокүчәр тетклһнә немр эв-арһ олзллһна туст көдлмшән хамцуллһна төрмүд хаһлхиг Хальмг Таңһчин жилищн-коммунальн эдл-ахун болн энергетикин министерствд даалһгдв. Тосхлтын, көлгн-күчнә болн хаалһин эдл-ахун министерствд аца зөөдг көлгнә эвакуац келһнә төлә шишлң техникәр тетклһнә төриг хаһлх кергтә гиҗ премьер-министр келв. Тер мет олн әмтн бәәдг һазр, производственн обьектс, гермүд күртл бачм дөң күрглһнә цергллтсин шишлң көлгн күрхин төлә сән таал тогтах кергтә гиҗ селвлцәнд келгдв.

Мана зәңгч

Видео