Баһчуд шин бүүртә болх

18-12-2020, 21:38 | Таңһчин зәңгс » Эндрк ґдрин тґрір

Хотл балһсна һардврин толһач Дмитрий Трапезниковин даалһврар энүнә дарук Васькина Галина баһчудт сертификатынь бәрүлҗ өгв. Эн җил Элстд 45 баахн өрк-бүлд эврә гер-бүүр хулдҗ авлһнд 25 444900 арслңга социальн дем өггдв. Теднәснь 26 өрк-бүл олн үртә болна. Дәкәд эн җил сертификат авсн өрк-бүлмүдәс 19-нь 2005-ч җилин моһа сарин 1 күртл гер-бүүрин таалан ясрулх зөвтә болсмн.
- Баахн улст гер-бүүрин таал ясрулхд шаңһас дөң күрггдҗәхнь бийдән тааста патьр эс гиҗ гер шүүҗ авх арһ өгнә. Элстин балһсна һардвр цааранднь чигн эн чинртә төр хаһлҗ, эн көтлврт орлцхмн. Баһчуд мана иргч болна, эдн хотл балһсан делгрүлҗ үүлдх улс болҗана. Тегәд бидн баахн улсиг, тер тоод олн үртә өрк-бүлмүдиг дөңнҗ, эднә төлә сән таал тогталһна көтлврт орлцхвидн. Эн көтлврәр олн үртә баахн улс гер-бүүрин төр хаһлҗахнь хойр дам байрта болна, – гиҗ Галина Васильевна келв.
Иван болн Марина Кулик һурвн үртә, ууһн көвүнь арвн тавта, бичкн икр күүкднь хө мөстә. Эдн эн сертификатар 661 миңһн арслң авв, терүнд экин сертификатын мөңгиг немәд шин гер-бүүр хулдҗ авхар бәәнә. Ирина Дюдишева болхла сертификатын мөңгиг шин герин тосхлтыг төгсәлһнд олзлҗ сән таал тогтахар санҗана.
Арвн хойр җилин эргцд бәәдл-җирһлд тохрагдҗах көтлврәр 442 өрк-бүл гер-бүүрин таалан ясрулҗ чадв, эн кергт федеральн, таңһчин болн муниципальн бюджетмүдәс 188 сай арслң йилһгдв.
Эн көтлврт 35 нас күрәд уга баһ наста улс орлцҗ чадҗана. Эдн гер-бүүрин таал ясрулх кергтә болҗах өрк-бүлмүдин тоод орх зөвтә. 2005-ч җилин моһа сарин 1 күртл тиим өрк-бүлмүдин тоод авгдсн болн олн үртә баахн улс хамгин түрүнд эн көтлврт орлцх зөв авна. Ирх җилд эн көтлврт 40 өрк-бүл орлцхмн гиҗ зуралгдҗана. Тедн 2021-ч җилин туула сард кергтә цаасан орулҗ өгх зөвтә болҗана.

ДООҖАН Наталья
ЗУРГТ: Элст балһсна һардврин толһачин дарук Васькина Галина гер-бүүрин сертификат
авсн Куликин өрк-бүлиг йөрәв

Видео