Медәтнр интернет олзлҗана

09-02-2021, 15:12 | Таңһчин зәңгс » Эндрк ґдрин тґрір

Пандемий эклсн цагас авн социальн көдләчнрин даавр кесг холванд икдв гиҗ келхлә үнн болх. Эдн хәләвртнь бәәдг медәтнрт, гемтә-шалтгта улст коронавирусн гем түгҗәх цагла онц оньган тусхаҗ, килмҗән өгч дөңгән күргхәр шунна. Нег үлү һанцарн бәәдг медәтнрт социальн кодләчнр хот-хоолынь хулдҗ авч, герин көдлмшинь кеҗ, эндрк бәәдл-җирһлин тускар күүндҗ, хальдврта гемәс саглуллһна тускар цәәлһвр огнә.

Ик Буурла района әмтнә социальн теткврин комплексн төвин социальн көдләч Манкира Ольга эн халхд 2011-ч җиләс авн көдлҗәнә. Тер цагас авн күүкд күн эн эрдм җирһлиннь һол керг болв гиҗ тоолна. Эн көдлн бәәҗ Хальмг Ик сурһуль төгсәһәд, мергҗлтән өөдлүлв. Ольга Викторовнан хәләврт тавн медәт бәәнә, күн болһн энүнд өөрхн элгн-садн мет болв. Эн көдлмштән өдгә цага эв-арһс олзлҗ, медәтнрин бәәдл-җирһлин таал ясрулхар шунҗ үүлднә. Тиигәд одахн эн медәтнриг интернет олзлдгиг дасхдг болв. Социальн көдләчин дөң-тусар аав-ээҗнр планшет болн смартфон олзлҗ талдан балһсдт бәәдг элгн-садтаһан видеозалһлдана эв-арһар күүнднә. «Цаг негәр бәәдго, җирһл нег ормдан бәәдго, урднь би йирин аав бәәсн болхла, ода онлайн-аав болув», – гиҗ медәтнр шоглҗ келәд, өдгә цага эв- арһ олзллһн туста болҗахиг темдглнә.
Келхд, зәрм медәтнр эдниг соньмсулҗадг төрәр үүлддг клуб олҗ авад, талдан регионмудт бәәдг улсла бат залһлда бәрҗ ухан-тоолврарн болн дамшлтарн хувалцдг болв. Эннь хальдврта гем түгҗәх цагла гертәсн һардго улст цаган тустаһар болн соньн кевәр давулхд туслна. Эдн тааста кергин тускар шин медрл хоршаҗ авч, билг-эрдмән чигн делгрүлнә. Социальн көдләч күн болһнд нәәһинь олҗ, шин кергәр соньмсулснд медәтнр ханлтан өргнә. Манкира Ольга бийнь цаһан седклтә, үр-иньгсг, әмтнлә ээлтә, шогта-наадта, сәәхн заңта болдг төләд эн күн болһнла сәәнәр таарна. «Мадниг иим сән социальн көдләч теткҗәхнь байрта. Эндрк җирһлин күчр-күнд таалд даргдлго, маднд нүдн-амн болад, мана әмдрл сәәхрүлхәр шунна. Мана Ольга Викторовна эрүл-менд бәәтхә, көдлмшнь күцәмҗтә болтха», – гиҗ медәтнр энүнд бүлән үгән келнә.
Көдлмштән дааврта, һавшун, үнн-чик седклтә болдг Ольга Викторовна селәнә әмтн дунд күндллһ олв. Радислав Семенович авальтаһан эн һурвн күүкән асрҗана, эднд үлгүр-үзмҗ болна.

ДООҖАН Наталья

Видео