Айсан җирһлин айс

06-03-2021, 15:02 | Таңһчин зәңгс » Сойл

Хаврин эклцәр дулан өдрмүд эклҗ, нарн һазриг герлтүлҗ, аһарт дууна айс соңсгдҗах болна. Эн сәәхн цагла дууна тускар күүндхнь зокаста. Эн төрин тускар дуучин эрдмиг медҗ авсн күүнәс сурх кергтәнь ил медгдҗәнә. Тегәд баахн наста дууч Айса Брюгидиковала күүндвр тогтасн биләвидн.

Айса болхла, Элст балһснд төрсмн. Энд өсч-боссн күн. “Элст балһсн – мини төрскн болв чигн, тохмарн Әәдрхнә муҗин Джакуевка селәнәсв. Тегәд би керәд ястав болад, тер һазриг нутгм гиҗ саннав”, – гиҗ Айса бийинь тускар келнә.
Бичкнәсн авн Айса ээҗнрнь домбр цокҗ дуулҗасинь соңсад, көгҗмд дуран өгсмн. 12-ч тойгта бичкдүдин садт оддг билә. Тер цагт ду эклҗ дуулв. “Бичкн концерт чигн тәвләвидн. Немәд келхд, ээҗм тенд көдлдг билә. Ода чигн көдләд бәәнә. Терүнәс бас үлгүр авнав. Ээҗм күчтә гидгәр дуулдг күн”, – гиҗ Айса бахтна.
Дунд сурһулин хойрдгч әңгд сурсн цагтан Айса 1-ч тойгта бичкдүдин билг-эрдмин сурһульд орв. Тер цагт энүг Лариса Летуева толһалдг бәәсмн. Ирина Эрендженован һардврт домбр цокч дасдг болв. Дарунь П.Чонкушовин нертә билг-эрдмин колледж орад, нертә дууч Анатолий Цебековин һардврт ду дуулҗ сурсмн. Зуг энүгәрн сурһулян зогсасн уга. Гнесинихнә нертә Әрәсән көгҗмин академьд бакалавр, магистратур чигн төгсәлә. “Москвад удан сурсн болв чигн, тенд үлдх санан нам толһад орсн уга. Баһасн авн дууч болад, төрскн Хальмг Таңһчдан көдләд, энүндән килмҗән өгнәв гиһәд санҗ йовдг биләв”, – гиҗ Айса тер цагин седкл-санаһарн хувалцв.
Магистратурт экләд сурчахдан, энтн хәрү Элстүрн ирәд А.Цебековин нертә Хальмг Таңһчин Государственн хорт көдлв. Келхд, энд академическ кев-янзар дуулх кергтә, Айса болхла бичкнәсн авн улсин янзар дуулҗ сурсмн. Тегәд, энүнә келсәр, экләд көдлхд, йир әәмшгтә болҗ медгдв, тер бийнь хойр кев-янзиг ниилүләд дуулҗ чадсмн. Билг-эрдмәрн соңсачнран байрлулдг болв чигн, иргч цагин үйнрлә бас дамшлтарн хувалцна: хорин көдлмшәс нань, Айса П.Чонкушовин нертә билг-эрдмин колледжд болн бичкдүдин үүдәлтин Төвд багшлна.
“Дуучин эрдм гисн амр керг биш. Яһад гихлә, тәәз деер һархла, бийән бәрх кергтә. Негдвәр, дуулҗах дууһан техникин талас шалһх кергтә: кииһән авлһн, айлт болн нань чигн цуг юмн зокаста болх йоста. Хойрдврар, дууна учр-утхчинь соңсачнрт медүлҗ, ухан-седклинь авлх кергтә. Цуг эн йовдлыг һурвхн-дөрвхн минут дотр багтаҗ күцәх кергтә”, – гиҗ Айса келнә. Көдлмштән дурта болад, Айса энүнә тускар зогсл уга удан күүндҗ чадна.
Моһа сарин нәәмн өөрдҗ йовх учрас нарт-делкән күүкд улсин Өдрин тускар бас күүндсн биләвидн. Эн гегән-герлтә сәәхн байриг Айса элгн-садтаһан, өөрхн улсла хамдан давулна. Түрүләд эрк биш эңкр ээҗдән золһад терүгән йөрәнә. “Дуучнр-биичнрин ик зунь байрин өдрмүдт көдлцхәнә. Чи болхла моһа сарин нәәмнд көдлхшийч? – гихлә, – нег чигн өдрт көдлсн угав, – гиҗ Айса хәрү өглә. Зуг минь тер кемд һар утцнь (мобильный) җиңнәд, моһа сарин нәәмнд ду дуулх кергтә гиҗ күн зәңглв. Тиим шогта-инәдтә йовдлар мана күүндвр төгссмн. Айса болхла әрүн цаһан седкләсн күүкд улсиг, нег үлү экнр-ээҗнриг өөрдҗ йовх байрла йөрәв.
МАНҖИН Санл

Видео