Сертификатыг тустаһар олзлна

18-03-2021, 17:17 | Таңһчин зәңгс » Эндрк ґдрин тґрір

Хальмг Таңһчин социальн делгрлтин, күч-көлснә болн көдлмшәр тетклһнә министерствин зәңглсәр, «Демография» гидг келн-улсин төсвин «Үрнь төрҗ һарсн цагт өрк-бүлмүдт дем күрглһн» гидг таңһчин төсвин керг-үүлдврмүдин медлд 97 өрк-бүл экин региональн сертификатын мөңгиг олзлв. Ут тоодан терүгәр эдн 6,4 сай арслң олзлв.
Экин региональн сертификат мана таңһчд 2012-ч җилин туула сарин 1-с авн һурвдгч үрнь төрҗ һарсн өрк-бүлмүдт өггдҗәнә. Тер цагас авн 2018-ч җилин бар сарин 31 күртл үрнь төрҗ һарсн өрк-бүлмүдин сертификатын кемҗән 70201,06 арслң тогтана. 2019 жилин туула сарин 1-с авн терүнә кемҗән өсәд, 107952 арслң тогтав. Эн көтлвр мана таңһчд 2026-ч җил күртл күцәгдхмн. Үрнь нег җилтә болхла эк-эцкнь сертификатын мөңгиг бүклднь эс гиҗ зәрм хүвинь олн зүсн кергт олзлҗ чадҗана. Тиигәд, эдн гер-бүүрин таал ясруллһнд, гер тосххин эс гиҗ онц эдл-аху бүрдәлһнә төлә һазрин участк хулдҗ авлһнд, үрнәннь сурһульд, эмнлһнд, герүрн инженерн коммуникацс оруллһнд, гер-бүүртән ясвр келһнд олзлҗ чадҗана. Ипотечн кевәр мөңг өгйәлҗ авсн болхла үрнь һарсн дару сертификатыг терүг даңцалһнд олзлҗ болхмн.

Видео