Бииһәрн нерән туурулҗ

01-04-2021, 17:41 | Таңһчин зәңгс » Күн болн җирһл

Зәрмдән күүнлә таньлдад, кесгтән хәрлцәд йовҗ, нег өдр тернь ямаран соньн-билгтә болдгинь генткн медәд авчкад, терүнә әмдрлин хаалһин тускар олн-әмтнд медүлх дурн күрнә. Тиим күмсин негнь болхла Хальмгин үндсни интернет-радион нәәрүләч Манҗин Эрднь мөн.
Эрдньлә таньлдснас авн нег җил болв. Зуг энүг биич болн көгҗмч гиҗ шиңкән медҗ авлав. Шидр энүнлә күүндвр тогтасн биләвидн.

- Эрднь, дууна нәәрүллһнә кергәр яһҗ соньмсвч?
- Дунд сурһульд сурсн цагтан биилдг биләв. Тер цагт зәрм биичнр биилдгән уурад, диджеймүд болв. Мини нег нәәҗ бас диджеингәр соньмсдг болв. Терүнәс үлгүр авад, ю яһҗ кехинь дасч авлав. Тер цагт түрүн болҗ аудиомонтаж кеҗ үзләв, зуг олҗ авсн көтлвриг олзлҗ чадсн угав. Ик сурһульд чигн бас дууна нәәрүллһәр соньмсдг биләв.
- Кезә биилдг болвч?
- Нарт-делкәд нер туурсн биич Мистер Виглзин (Mr Wiggles эс гиҗ Стефан Клементе) келсәр, залу күн хойр учрар юм экләд кенә: олн-әмтиг өврүлхәр эс гиҗ күүкд улсин оньг авлхар. Би болхла хойрдгч учрар экләд биилләв.
Ахм брейкдансар соньмсдг бәәсмн. Би бас биилхәр седләв. Зуг бииһин багд орҗ чадлго, ик гидгәр һундҗалав. Дарунь йисдгч класстан сурһулин керг-үүлдврт орлцсн нег көвүн тектоник биилсинь үзләв. Тер кемд биилх дурм күрв. Ютуб хәләҗ тектоник эклҗ даслав. Бәәҗәһәд, электроденсәр соньмсдг талдан көвүд-күүкдлә таньлдсн биләв.
- Талдан балһсдт давулгдҗадг марһас - фестивальмүдт орлцдг биләт?
- Теднлә хамдан мадн кесг команд бүрдәввидн. EDT (Electro Dance Team) командын ханьд орув. Элстд давулгдҗасн керг-үүлдврмүдт орлцҗ билг-эрдмән үзүлләвидн. Әәдрхн, Сарпуль, Таганрог болн нань чигн балһсдт одад марһаст орлцдг биләвидн.
2010-ч җилд «Элиста-Крю» нерәдлһтә баг бүрдәҗ, Москвад давулгдҗасн Вертифайт (VERTIFIGHT) электроденсин марһанд орлцувидн. Тер җилд арвдгч класст сурад, кесг шүүвр өгләв. Нег шүүвр марһан болх өдрт давулгдла. Тиим болв чигн багшнр шүүвриг талдан өдрт давулад, Москваһур одх арһ өгв. Тегәд мана команд йир сәәнәр бийән үзүлсмн. Басңгин Арслң нәәҗтәһән финалд һарад, түрүн орм эзлләвидн.
- Тиим кевәр таңһчиннь нер туурулснтн йир сән.
- Немәд келхд, тер җилмүдт электроденсәр соньмсдг улс цуһар Хальмг Таңһчиг меддг бәәсмн. Элстәс бииһин команд ирәд марһанд орлцхиг олн-әмтн даңгин күләдмн. Москва балһсна «MisterCho» командын ханьд мана һазра нег көвүн биилдг билә. Тер маднд сүв-селвг өгәд, даңгин нөкд болдмн.
- Эрднь, ода биилдвч?
- Хая-хая биилнәв. Зуг бииһин керг-үүлдврмүдт орлцдган уурлав. 2012-ч җилд нанд Манежная талвңд болсн «Вертифайт» фестивальд дәкн нег орлцхин туст үрвр кесн билә. Тенд Әрәсән электроденсин йилһән сән арвн зурһан биичиг шүүҗ авдг бәәсмн. Бииһин марһан болхмн гиҗ һурвн өдр урдаснь медҗ авлав. Тегәд белдҗ чадсн угав, тиигсн бийнь полуфиналд һарад, йилһән сән нәәмн биичин тоод орлав.
- Давсн җилд Элстд болсн бииһин марһанд орлцад, түрүн орм эзлсн биләч.
- Тиим. Балһсна өдрин байрин йовудт бииһин марһан давулгдла. Зуг терүнд орлцх санан чигн уга билә. Нәәҗнрм дуудхла зөвшәрәд, тенд бас түрүн орм эзлхв гиҗ нам сансн угав.
- Тер бииһин марһанд «директор» нертәһәр орлцлач. Яһад иим нер шүүҗ аввч?
- Эннь болхла, нәәҗнрин нег шогас һарсн нерн болҗана. Урднь болсн марһаст талдан нерәр дуудулҗ орлцдг биләв. Зуг хәләһәчнриг, нәәҗнриг болн талдан биичнриг невчк өврүлхәр иим шог нер шүүҗ авлав.
- Удан цагт күцәмҗтәһәр биилҗәсн күн яһад эн эрдмән хайчквч?
- Биид ода чигн дуртав. Электроденсин делкәһәр даңгин соньмсад бәәнәв. Зуг сүл җилмүдт аудиомонтаж кеһәд, дууна нәәрүллһнд бас дуран өгләв. Тегәд чигн нурһлҗ ирлцңгү төсвс күцәнәв.
Хальмгин үндсни интернет-радиод кеҗәх көдлмшәс нань талдан чигн төсвс күцәлһнд бас орлцнав. Дәкәд зәрмдән эврә көгҗм интернетд һарһад, цөөкн соңсачнртан тусханав.
- Кен чини соңсачнр болна?
- Тедн нурһлҗ мини сән нәәҗнр. Тегәд ода деерән мини көгҗмиг цөөкн улс соңсна.

МАНҖИН Санл
Хальмгин үндсни интернет-радион, тер тоод Манҗин Эрднин нәәрүлсн чигн, соңсхврмудыг
эн QR-код олзлҗ соңсч чадҗанат.

Видео