Төрскнәннь төлә әмән өгв

Сегодня, 09:00 | Общество, Таңһчин зәңгс, Зіњг, Күн болн җирһл, Эдн Төрскән харсла

2024 җилин ноха сарин эклцәр Курск мүҗиг хортн дәврсн билә. Йисн сардан тенд әәмшгтә дәәлдән болв. Мана орн-нутгин цергчнр өдр-сө уга төрскн һазран зөргтәһәр харсв. Һундл төрхд, кесгнь баатр кевәр әмнәсн хаһцсн болдг.
Тер зөргтә дәәчнрин дунд нег һазра көвүн Манҗин Дорҗ бас йовсмн. Дорҗ 1996 җилд Ик Буурла района Зунда Толһа селәнд олн үртә бүлд һарсмн. Шулун-шудрмг, нег ормдан суудго, дааврта, билгтә, спортар соньмсдг көвүн болҗ өсв. Манҗин Дорҗ кезә чигн ахнран күндләд, дүүнрән эрклүләд йовдг билә. Негдгч классас авн 8-ч класс күртл Дорҗ Зунда Толһа селәнә дунд сурһульд сурад, ах классмудан Элстин техническ лицейд төгсәсн болдг. Дунд сурһульдан сурч йовсн цагтан эн цергә үүлдврәр соньмсв.
Лицейин хөөн Манҗин Дорҗ цергә ик сурһульд орҗ чадсн уга, тегәд эн Санкт-Петербург балһсна Полярн академьд орҗ сурв. Негдгч курсас авн хальмг көвүн сурһулян сәәнәр сурсн деерән олна бәәдл-җирһлд шунмһаһар орлцдг болв. Нег җилдән сурад, Дорҗ зөрсндән күрхәр седәд, Калининград балһснд Әрәсән ФСБ-н ик сурһульд орад, күслдән күрв. Оютна җилмүд байрта-бахта кем гиҗ тоолгддг. Эн цагин туршт Манҗин Дорҗ олн үүрмүдтә болв. Тер мет зуульчлад, Эльбрус уул деер чигн давшҗ һарад, тенд Хальмг Таңһчин туг делскв. Терүнәс нань билгтә көвүн арсар олн зүсн кегдлмүд уйдг дасв. Өөрхн элгн-садндан, нәәҗнртән эврән кесн кегдлмүдән белглдг бәәҗ.
2019 җилд ик сурһулян төгсәһәд, хату цаасан авч, Курск мүҗин Глушковск района Теткино селәнә меҗән әңгд күч-көлснә хаалһан эн эклв. Мел эн әңгин һардачин үүлдән Дорҗ дамшлт хоршаһад, көдлмшин нуувчинь медҗ авв, гиҗ келх кергтә. Санкт-Петербургд сурч йовсн цагтан Дорҗ Иркутск балһснас ирсн Мария күүкнлә таньлдад, үүрлдг болв. 2019 җилд баһчуд өрк-бүлән өндәлһәд, Теткино селәнд бәәршлв. Дорҗ дааврта көдлмшт бәәсинь медәд, авальнь энүг цуг халхар дөңндмн. Мария спортын эрдмчин кандидат болад, спортын сурһульд дамшачар көдлсмн. Дорҗла хамдан арсар уйдг дасад ке-сәәхн кегдлмүд кеҗ һарһдг билә.
Хөөннь Дорҗд Курск мүҗин Суджа балһсна меҗән 2-ч тойгта әңгин һардачин үүл даалһгдв, тегәд баахн өрк-бүл тиигәрән нүүҗ ирәд, 2022 җилд София күүкнь һарв.
Цергә шишлң керг-үүлдвр экләд, орн-нутгт амр биш бәәдл тогтсинь медәд, Дорҗ эврән БПЛА-г залдг дасад, хамдан церглҗәдг үүрмүдән чигн бас дасхсн бәәҗ. Дарунь Дорҗд меҗән цергллтин III, хөөннь II девсңгүдин йилһән сән көдләчин нер зүүлһгдв. Тиигхд ах лейтенант Манҗин Дорҗ «Суджа» харулын меҗән бүртклһнә әңгин һардачин дарукд батлгдв. СВО-н йовудт хальмг көвүн әмән әрвллго дәәлдәд, ВСУ-н цергә олн техник уга кев. Баатр йовдл һарһад, эн удл уга капитана цол зүүв, цергә керг-үүлдврин ветеран болв. Манҗин Дорҗин цергә үүлдврин тускар Әрәсән ФСБ-н барин һарцд статья чигн барлсн билә. Эннь өөрхн элгн-саднаннь болн үүрмүдиннь төлә байр-бахмҗ үүдәсн болдг.
2024 җилин ноха сарин 5-ас авн Дорҗ үүрмүдтәһән хамдан һурвн өдртән зогслго дәәлдсн болдг. Тиигхд энүнә командир күндәр шавтад, Дорҗ цергә керг-үүлдвриг эврән һардв.
Догшн дәәлдәнә һурвдгч өдртнь Дорҗ әәмшгтә бәәдл тогтагдҗахинь медәд, авальдан болн элгн-садндан җиңнүлв. Тер цагт Мария бичкн күүктәһән Суджа балһснд гериннь подвалд бултад, маңһдуртнь өрүн өрлә балһсна олн-әмтнлә хамдан тендәс һарад зулҗ.
2024 җилин ноха сарин 7-д хортн Курск мүҗиг улм бомбдад, Манҗин Дорҗ күндәр шавтад, сүл әмсхл күртл залу-зөргтәһәр дәәлдәд баатр кевәр әмнәсн хаһцв.
Кезә чигн Төрскән харслһн әрүн керг болдг. Төрскн һазр-уснаннь, өөрхн элгн-саднаннь болн эвин төлә эн әмән өгсн болдг. Хальмгин хәәртә үрн, ФСБ-н офицер, Манҗин Дорҗин нерн орн-нутгин болн таңһчин тууҗд орснь лавта. Одахн Элстин техническ лицейд Баатрин ширә секгдәд, нернь мөңкрүлгдв.
Цергә шишлң керг-үүлдврт ончрсн хальмг көвүнә нерн орн-нутгин тууҗд орад, энүнд Әрәсән Баатрин өөдән нер зүүлһхин төлә ФСБ-н заллтын һардвр ирлцңгү бәрмт цаас белдәд, орн-нутгин толһачин хайгар йовулсн билә.

КАРСАНА Евгения

Видео