Фронтд дөң-тусан күргсн төлә

07-03-2026, 12:09 | Таңһчин зәңгс, Зіњг, Күн болн җирһл

Күүкд улсин нарт-делкән сән Өдр угтҗ, залврин Герт Хальмг Таңһчин күүкд улсин ниицәнә гешүд цуглрв. Тедниг таңһчин һардврин, олна болн баһчудын бүрдәцсин элчнр йөрәв.
Делкәд күүкд улсин чинрнь аһу ик гиҗ темдглх кергтә. Мана ээҗнр, экнр, эгчнр, күүкд, ачнр-зеенр олн зүсн халхар көдләд, таңһчин делгрлтд тәвцән орулҗ йовна.
Байрин хургин йовудт олна бәәдл-җирһлд шунмһаһар орлцдг таңһчин күүкд улсиг кесг темдгүдәр ачлв. Тедн дунд күүкд улсин ниицәнә Көтчнрә района әңгиг һардҗадг Эрнҗәнә Вера бас заагдв.
«Төрскнәннь күүкд» нертә медаляр эн ачлгдсмн. Вера Борисовна Көтчнрә районд бүрдәгддг керг-үүлдврмүдт шунмһа орлцач болсн деерән арһлачин кергән делгрүләд йовна. Тер мет Көтчнр селәнә муниципальн бүрдәцин депутат болна. Сүл хойр җилдән күүкд улсин ниицәнә района әңгиг чадмгар һарддг болв.
Талтахна бер Вера Борисовна Сергей Николаевич авальтаһан хамдан һурвн үрән өскәд, сән сурһмҗ болн сурһуль өгәд, чик хаалһднь орулв. Эндр көвүнь болн хойр күүкнь өрк-бүлмүдтәһән Элстд бәәнә.
Көтчнрә района күүкд улсин ниицәнә әңгин ханьд ут тоодан 150 шаху күн орна. Нидн Алдр Диилврин 80 җилин ончта өөн темдглҗ ниицәнә күүкд улс кесг керг-үүлдвр бүрдәв. Темдглхд, цергә шишлң керг-үүлдврт орлцачнрин төлә буйнч илгәвр цуглуллһнд бас нилчән күргнә. Тер төләдән 2025 җилд Вера Борисовна «Фронтд дөң-тусан күргсн төлә» хойрдгч девсңгин медаляр ачлгдсн билә.
2025 җилин намрар Көтчнрт Цанид Чөөрә хурл босхгдад, байрин бәәдлд секгдв. Бүрдәмҗин комитетин ханьд Эрнҗәнә Вера бас орсиг темдглх кергтә. Хурлан тосххин төлә нег һазра улс таңһчин селәдәр олн концерт бүрдәһәд, мана орн-нутгин Москва хотл балһсн күртл күрсн билә.
– Әрәсәд олн улсин ниицлтин җил зарлгдснас иштә ирлцңгү көдлмш бас күцәгдхмн. Өцклдүр Көтчнр селәнә сойлын Герт күүкд улсин сән Өдрт нерәдсн байрин концерт болв. Темдглхәс, энүг зуг залу улс бүрдәһәд, нег һазра күүкд улсан йөрәв, – гиҗ Вера Борисовна келв.
Нарт-делкән күүкд улсин сән Өдрлә Эрнҗәнә Вераг йөрәҗ, Хальмг Таңһчин, нег үлү төрскн һазр-уснаннь делгрлтд цааранднь чигн тәвцән орулҗ йовхинь мөрәдҗәнәвидн.

Видео