Баатрин нерн мөңкрүлгдв

Сегодня, 13:05 | Общество, Таңһчин зәңгс, Зіњг, Күн болн җирһл

Әрәсән орн-нутгт «Баатрин ширә» нертә сурһуль-эрдмин төсв «Негдсн Әрәсә» партин седвәрәр 2018 җиләс авн экләд күцәгдҗәнә. Дорас өсч йовдг үйнрт төрскнч сурһмҗ өглһн төсвин һол күсл болна. Сүл җилмүдт мана орн-нутгт, нег үлү Хальмг Таңһчин сурһуль-эрдмин бүрдәцст ирлцңгү ширәс секгдәд, нег һазра баатрмудын нерд мөңкрүлгдҗәнә.
Одахн нефтин болн газин Хальмг колледжд эн сурһулин бүрдәциг төгсәсн Музран Нәәмнд нерәдсн «Баатрин ширә» секгдв. Энүнә элгн-саднь, СВО-н ветеранмуд, таңһчин сурһуль-эрдмин болн номин министерствин элчнр, багшнр, оютнр, Цаһан Нур селәнәс ирсн нег һазра улс эн керг-үүлдврт орлцв.
Музран Нәәмн Октябрьск района Цаһан Нур селәнд 2000 җилин лу сарин 16-д һарсмн. Зурһатадан Советин Союзин Баатр Санҗра Николайин нертә селәнә бәәрн сурһульд негдгч класст орсн болдг. Сурһулян сәәнәр сурсн деерән района болн селәнә олна бәәдл-җирһлд шунмһаһар орлцдг билә. Тер мет Октябрьск района футболын багин ханьд спортын марһаст орлцад ончрсмн. Терүнәс нань «Санджировин ачнр» нертә җисәнд орлцач бәәсмн.
Йисн классан төгсәһәд, нефтин болн газин Хальмг колледжд орҗ сурв. Энд бас колледжин олна керг-үүлдврмүдт орлцдмн. 2019 җилд хату цаасан авад, цергт мордв. Ростов-на-Дону балһснд цергләд, хөөннь бооца батлад 2022 җил күртл тенд бәәсмн. Церглҗ йовсн цагтан даалһсн кергүдән цаг-болзгтнь күцәдг билә.
2024 җилин туула сард болхла Әрәсән харслтын Министерствлә бооца батлад, нег һазра дәәчнрин үлгүрәр цергә шишлң керг-үүлдврт эн орлцв. Сарпулин крайин Буденновск балһснд цергә халхар белдвр авад, цааранднь Донецк Улсин Республикд тусв. Тер җилин лу сарин 14-д ДНР-ин Докучаевск районд цергә даалһвран күцәҗ йовад, зөргтә баатр кевәр әмнәсн хаһцсмн.
Олн үүрмүдиннь тодлсар, цаһан седклтә, тевчңгү, һольшг нәәҗ цугтаднь нөкд болхар адһдг билә. Нидн хулһн сарин 6-д Әрәсән Президентин зәрлгәс иштә Музран Нәәмнә өөрхн элгн-саднднь энүнә залу-зөргин орден бәрүлҗ өггдв.
Нефтин болн газин Хальмг колледжин һардач Игорь Терещенкон келсәр, багшнрин болн оютнрин төлә эднә сурһулин бүрдәцд иим зөргтә баатр Музран Нәәмн сурч йовснь темдгтә болҗана. Мана колледжд «Баатрин ширә» секгдәд, Музран Нәәмнд болн өдгә цагт Төрскән харсчадг цуг дәәчнрт эннь ханлтын темдг болҗахнь лавта гив. Төрскн һазрин йоста баатриг өсксн эк-эцкднь ханлтан эн өргв.
– Мана таңһчин сурһуль-эрдмин бүрдәцст «Баатрин ширәс» секгдәд, дорас өсч йовдг баһчудт төрскнч сурһмҗ өглһнд ик оньг тусхагдҗана. Музран Нәәмнә өөрхн элгн-саднлань зовлңгинь хувалцад, энүнә санлынь мөңкрүлҗәнәвидн. Зөргтә баатрмуд мадн дунд бәәхиг бичә марттн, – гиҗ сурһуль-эрдмин болн номин министерствин әңгин һардач Увшин Зоя баһчудт селвг өгв.
Цаһан Нуура СМО-н толһач Ээнән Галинан темдглсәр, баатрмудын һазрт олн үртә бүлд өсч-боссн Музран Нәәмн Талтахна әәмгиг туурулсн улсин тоод орад, нерән мөңкрүлсн болдг. Өдгә цагин баһчуд иим залу-зөрмг баатрмудас эрк биш үлгүр авх зөвтә гив.
Цергә шишлң керг-үүлдврин ветеранмуд Ээнән Андрианд болн Трафимә Дольганд «Баатрин ширә» секх зөв өггдв. Сурһулян йилһән сәәнәр сурдг колледжин негдгч курсин оютн Кирилл Бездеткод болхла «Баатрин ширән» ард суудг зөв өгв.
– Дөрвн җилдән 23 оютн дунд мини багд сурч йовсн Музран Нәәмн сурһулян сәәнәр сурад, колледжин спортын болн талдан олн зүсн халхар давулгддг кергүдт шунмһа кевәр орлцдг билә. Баахн бийнь йоста залу болад, келсн үгдән күрдг күн билә. Төрскән харсх шиидвр авсинь медәд, алң болсн угав, тер юңгад гихлә Нәәмн туурмҗта Цаһан Нур селәнд өсч-босла. Тер мет оютн бәәсн цагтан дааврта, зөргтә күн болҗ бийән үзүлҗ йовла. Төрскнч седклтә мана оютн Музран Нәәмн мөңкинд мадна зүркнд үлдхмн, – гиҗ колледжин багин һардач Удан Артем тодлврарн хувалцв.
Ода болхла колледжд сурдг көвүд-күүкд нег һазра Баатрин санлынь тевчәд, терүнәс үлгүр авч, сурһулян сәәнәр сурч, олна бәәдл-җирһлд шунмһаһар орлцх гисн иткл үүднә. Зөргтә дәәч, Төрскән харсач, залу-зөргин орденәр ачлгдсн Музран Нәәмнә нерн нег һазра улсин санлд мөңкрхнь лавта.
ОЛЬДАН Цаһан

Видео