Тәрлһ келһиг шунмһадулхмн

20-04-2021, 16:14 | Таңһчин зәңгс » Зіњг

Шидр мана таңһчд коронавирусн гемин «британск» штамм нег күүнд илдкгдв. Терүнә тускар таңһчин ах санитарн эмч Санҗин Җаңһр зәңглв. Эн штамм Англь орн-нутгт давсн жилд намрар илдкгдсн билә. Эн дарунь тархагдна, тегәд кесг күн дарунь гемтх әәмшг бәәнә. Эн гем күнд кевәр давна, тегәд терүнәс саглуллһна тәрлһиг эрк биш авх кергтә гиҗ ах санитарн эмч темдглв. Мана орн-нутгт эн гемәр күнд кевәр гемтсн улс нурһлҗ 60 һарсн медәтә улс бәәсн болхла, «британск» штамм тархагдсн орн-нутгудт баһ наста улс олар гемтснь илдкгдсмн. Мана таңһчла хам-хоша бәәдг Сарпулин крайд, Кабардино-Балкарьт, Дагестанд болн Ростовск мүҗд бас эн штамм илдкгдв. Тегәд цуһар эн гем хальдврта болҗахиг мартлго саглуллһна некврмүд күцәх зөвтә, тәрлһ авх кергтә, гиҗ Җаңһр Николаевич таңһчин әмтнд дуудвр кев.
Таңһчин эрүл-менд харлһна министерствин то-дигәр, сүл хонгт дәкәд 9 күүнд коронавирусн гем илдкгдв. Ут тоодан пандемий эклсн цагас авн мана таңһчд 20298 күн гемтв. Теднәснь 19562 күн эдгв. Ода таңһчин госпитальмудт 202 күн эмнлһнд бәәнә. Күнд кевәр гемнь давҗах 11 күүнәс 4-нь ИВЛ-аппаратар кииһән авчана. Һундл төрхд, мана таңһчд 331 күн эн әәмшгтә болн хальдврта гемәс иштә сәәһән хәәв.
Таңһчд коронавирусн гемәс саглуллһна тәрлһ келһнә керг-үүлдвр цааранднь күцәгдҗәнә. Таңһчин эрүл-менд харлһна министерствин то-дигәр, ода деерән 27 миңһн күн тәрлһ авв. Таңһчин райодын эмнлһст селәдин әмтнд тәрлһ келһнә төлә цуг таал тогтагдсн бәәнә, тегәд сүл өдрмүдт тәрлһ авсн улсин то икдҗәхнь темдглгдҗәнә.

Мана зәңгч

Видео