Селәнә бичкдүдиг байрлулсн «Харада»

20-04-2021, 16:15 | Таңһчин зәңгс » Зіњг

Одахн Ик Буурла района Приманыч селәнд ончта болн байрта йовдл учрв. Энд «Демографь» гидг келн-улсин төсвин медлд тосхгдсн бичкдүдин сад секгдв. Өдгә цага некврлә ирлцдг ке-сәәхн бичкдүдин садт 50 күүкн-көвүн орхин төлә цуг таал тогтагдв.
Энд бичкдүд наадхин, сурхин, билг-эрдмән делгрүлхин, цогц-махмудан батрулхин болн цаган сергмҗтәһәр давулхин төлә цуг таал бәәнә. Урднь бичкдүдин сад нурҗах герт бәәршлҗәлә, тегәд селәнә бичкдүдин төлә шин бәәр тосхх шиидвр авгдсн билә. Эн объектин тосхлтд федеральн бюджетәс 39 сай арслң йилһгдсмн. Тосхачнр объектиг цаглань төгсәхин төлә көдлмшән дигтә-даратаһар күцәв.
«Харада» гидг бичкдүдин сад секлһнә байрин керг-үүлдврт таңһчин сурһуль-эрдмин болн номин министр Барина Эрднь, Ик Буурла района муниципальн бүрдәцин толһач Бадмин Вячеслав, «Ростстрой» гидг тосхлтын бүрдәцин ахлачин дарук Захар Юдинцев, Приманыч селәнә муниципальн бүрдәцин толһач Опан Арлтан орлцв. Бичкдүд билг-эрдмән үзүлҗ, гиичнриг байртаһар тосв.
- Эн сурһулин бүрдәцд дорас өсч йовх бичкдүд сурһмҗ авч, гүн медрл хоршаҗ өсхмн. Бичкдүдин садын материальн-техническ теткврнь сән нааддг талвң энд бәәнә. Эн бүрдәцин тосхлһнд ик тәвцән орулсн Ик Буурла района болн «Ростстрой» гидг ООО-н һардврт ханлтан өргҗәнәв. Приманыч селәнә улст таңһчин һардврин болн правительствин нерн деерәс бат эрүл-менд дурдҗанав, мана бичкдүд чаңһ-чиирг, эрүл-дорул өстхә, – гиҗ таңһчин сурһуль-эрдмин болн номин министр йөрәлин үгдән темдглв.
«Харада» гидг бичкдүдин садын һардач Максима Байртан келсәр, энд 50 күүкн-көвүнә төлә орм бәәнә. Зуг ода деерән 26 күүкн-көвүн ордг болхмн, энд һурвн баг үүлдхмн. Эн бүрдәц секгдснә ашт 18 көдлмшч орм бүрдәгдснь темдгтә. Бичкдүдин сад шин өлг-эдәр, медицинск кергсләр, шишлң техникар, сурһулин дөңцл материалар теткгдв. Энд түүмрәс саглуллһна болн видеохәләврин систем углҗ тәвгдсн бәәнә. Санитарн-эпидемиологическ бәәдл учртан авгдҗ, энд хальдврта гемәс саглуллһна кегдлмүд болн эв-арһс бәәнә. Өрүн болһн бичкдүдин эрүл-мендин бәәдл шинҗлгдхмн.
Дорас өсч йовх күүкд-көвүдин төлә иим ке-сәәхн бичкдүдин сад тосхгдснь, бәәрн улс көдлмшәр теткгдснь Приманыч селәнә бәәдл-җирһлд ончта йовдл болв. Талдан һазрт көдлҗ йовсн улс төрскн селәндән хәрү ирҗ сурһмҗлачар көдлхнь хойр дам байрта болҗана. Баахн өрк-бүлмүд иим бичкдүдин сад секгдснд нег үлү байрлҗ, эднә үрд иим таалд өсхиг өөдәнәр үнлв.

БАТАН Сәәхлә

Видео