Урһа модна сүүдрт амрхар седхлә...

05-08-2021, 12:41 | Таңһчин зәңгс » Зіњг

Хальмгт йир халун болдгас көлтә мана таңһчд модд урһалһнд ик оньг өггднә. Балһсн-селән болһнд күүнә күчәр суулһгдсн паркс нүд байрлулҗ, эргндк бәәдлиг кеерүлнә. Үлгүрнь, урднь Элстд нег чигн модн уга бәәсмн. Ода хәләһит. Хая хур-чиг ордг регионд бәәсн бийнь хальмг хотл балһсн Өмн үзгин федеральн округд урһа моддарн ончрҗадг балһсдын тоод орна. Тернь учрта. Давсн зун җилин 50-ч җилмүдин хойрдгч өрәлд хальмг улс Сиврәс төрскнүрн нүүҗ ирхд таңһчд әмтн бәәдг гермүд тосхлһн болн модд урһалһн хамгин эркн көдлмшт тоолгдснь лавта. Тер цагт Элст балһснд болн райодт сар болһн миңһәд модн тәргдәд билә. Тиигхд Элст балһсна эргнд көк-модд экләд урһасмн. Хөөннь таңһчиг һардсн Б. Б. Городовиков эн көдлмшиг давулад сән йовудтаһар күцәлә.
Би тер цагиг му бишәр меднәв. Бидн школд сурчасн цагла модд тәрлһн дунд сурһулин зурад эрк биш ордг бас үнн. Келхд, эн сән авъяс ода күртл бәәһә. Бичкнәсн авн маднд мана эк-эцкнр: « Модд бичә хамхлтн! Модд суулһтн! Мод урһалһн олзта-туста болна!» - гиҗ маднд келдмн.
Ода бидн эврәннь күүкдтән бас тиим уха зааҗанавидн. Юңгад гихлә модн аһариг цеврлнә, зуни кемд сүүдртнь бултҗ болна, үвлднь болхла киитн салькиг зогсана. Мадниг зер-земшәр теткнә, мана балһсд селәдиг сәәхрүлнә.
Харм төрхд, одахн Элст балһсна Ю. Клыковин нертә уульнцд зөв угаһар дала модд көрәдҗ уга кеснь мадниг үүмүлв. Тенд 1980-2000-ч җилмүдт дала модд урһагдсинь цугтан меднә. Тегәд мана балһсиг сәәхрүлҗәсн моддыг кен көрәдсмб? Ода эн үүл татлһн Элст балһсна прокуратурин медлд бәәнә. Теднә кесн то-дигәр, зөв угаһар модд көрәдәд балһснд 91 миңһн арслң һару учрсмн. Өдгә цагт үүл татсн улсин туст мөшклһн эклв. Эн җилин хөн сарин 24-д «Балһсна урһа-модна эдл-аху» МБУ-н һардач зөв өгдг цаасн угаһар, эврәннь үүлән давулҗ олзлад, ямаран чигн зөв угаһар эдл-ахун көдлмшчнрт Ю.Клыковин уульнцар 1-ч тойгта герин өөр бәәсн моддыг көрәдх заквр өгсн болна. Аштнь эдн 11 мод көрәдәд уга кеҗ. Эн туст кесг сурвр үүднә. Модд көрәдх заквр өгсн балһсна МБУ-н һардач ямаран күн болҗахмб? Төвиг модд балһсна эн кеерүлҗәсинь меддго билү? Модд кенд харш болҗала? Эн сурврмуд айстан биш мини уханд орв, юңгад гихлә нег мод урһатл кесг җил давна.
Ода үүл татсн улс ямаран цааҗла харһҗ чадхмн гисн сурвр үүднә.
Келхд, мана таңһчд зөв угаһар модд чавчад көрәдәд уга кесн улс зарһин шиидврәр цааҗла харһад уга билә. Кемр үүл татсн улс ялд унад эс гиҗ олн часин туршт көдлмш кеһәд засглгдхла, дәкҗ иим йовдл учршго гисн бат нәәлвр үүднә.

БЕМБИН Очр

Видео