Мини дурта балһсм Мөңкинд чамаг эңкрлнәв...

20-09-2022, 11:03 | Общество, Таңһчин зәңгс

Давсн амрлһна өдрмүдт Элст балһсн 157 җилин өөнән темдглв. Балһсна сән өдрт нерәдгдсн керг-үүлдврмүдт ик-бичкн уга орлцҗ, сергмҗтәһәр амрч цаган байрта-шуугатаһар давулв. Эн өдрмүдт спортивн, бичкдүдин тергдин марһас, шимтә хот-хоолын, бииһин фестиваль, келн-улсин сойлын байр, концерт болн нань чигн керг-үүлдвр болв. Байрт кесг гиичнр болн зуульчнр орлцҗ, мана таңһчин хотл балһсна байр өөдән кемҗәнд бүрдәгдсиг темдглв.

Сән авъяст тохрсар эн өдр селәнә эдл- ахун эдл-уушин яарм болв. Балһсна дорд үзгин рынкд өрүн эртәс авн әмтн ирҗ, мах, темс, зер-земш, ик царңга тутрһ, заһс, һуйрин зүүтә кегдлмүд, бал болн нань чигн эдл-ууш хулдҗ авв. Келхд, эн өдр ут тоодан 5 тонн хөөнә, үкрә болн һахан мах хулдгдв, заһс болн терүнә зүүтә хот-хол, Яшалтан районд урһасн альм әмтн таасч хулдҗ авв.

Хотан батлад, хулд кесн улс байрин нәәрт өрк-бүләрн орлцхар балһсна төв талвң тал адһв. Тенд олн келн-улсин байр болв. Хальмг, орс, азербайджан, түрг, армян, дагестан, корей, узбек болн нань чигн келн-улсин олна ниицәс ке-сәәхн хувцан өмссн, ду-бииһән үзүләд, олн гиичнриг шимтә болн сенр хот-хоолар тоов. Б.Б.Городовиковин нертә Хальмг деед сурһульд олн келн-улсин элчнр сурдгиг бидн сәәнәр меднәвидн. Тегәд оютнр балһсна нәәрт бас орлцхар ирәд, эврәннь келн-улсин сойлла таньлдулв (зургт). Тиигәд, малын эмчин эрдм дасчах Ирода Сабирова болн медицинск дацнд сурчах Бегмират Саттаров узбек болн туркмен улсин хот-хол белдв. Баһчудын келсәр, эдн келн-улсин байрин сән өдрмүд болхла үүрмүдән олн зүсн хотар тоона. Үлгүрнь, Навруз байрт эдн сумаляк хот белднә, терүг 24 частан буслһад чанх кергтә. Эдн чорек, ишлекли, фитчи, петир, самса болн нань чигн келн-улсин хот белдҗ эн нәәрт авч ирв. Раим болн Кристина Файзулинихн түрг улсин нерн деерәс нәәрт орлцв. Эднә келсәр, мана таңһчд тавн миңһн һар түрг бәәнә, эдн Яшалтан болн Городовиковск райодт олар бәәршлнә. Келн-улсин байрт «Зултрһн» болн «Степняночка» гидг ансамбльмудын орлцачнр хальмг-орс ду дуулҗ, нәәрт орлцачнрт ик байр үүдәв, кесгнь ормдан тесч чадад эдниг дахад биилв. Нәр шуугата, байрта кевәр давв.

Дигтә эн цагла таңһчин правительствин ик залд Элст балһсна Өдрт нерәдгдсн байрин хург болв. Таңһчин хотл балһсиг сән өдрләнь йөрәхәр кесг гиичнр ирв. Тедн дунд Әрәсән орн-нутгин Хүүвин депутатнр Башанкан Бадм, Андрей Гимбатов, Аһш балһсна хүүвин Ахлачин дарук Геннадий Кузнецов болн депутат Андрей Петров, Улан Удэ балһсна мэрин дарук Николай Намсараев. Күндтә гиич болҗ Украинд болҗах шишлң цергә керг-үүлдврт орлцачнрт бичг бичсн Варвара Нажмиева Аһш балһснас ирв. Байрин хургиг Элст балһсна залврин толһач Шафран Тепшинов нүр үгәр секәд, эндр мана хотл балһснд социальн халх делгрҗәхиг, шин объектс эдлврт орулгдҗахиг, хаалһс шинрүлгдҗәхиг онц темдглв. Җил ирвәс Элстүр зуульчлҗ ирҗәх улсин то икдҗәхнь мана бичкн балһсн олн әмтнд соньн болн өвәрц болҗахиг герчлҗәнә. Балһсна сурһуль-эрдмин халх делгрүллһнд ик тәвцән орулҗ, өөдән мергҗлттә эрдмчнриг болн номин үүлдәчнриг белдҗәх төләдән КалмГУ-н һардач Салан Бадм Элстин залврин толһачин ханлтын бичгәр ачлгдв.

Элст балһсна Хургин Ахлач Орзан Николай хальмг келәр йөрәл тәвҗ, хургт орлцачнрт хөв-кишг дурҗ, мана хотл балһсн цааранднь делгрҗ цецгәрҗ йовтха гив. ЭГС-ин Ахлач Хальмг Таңһчин прокуратурин ветеран Ульяна Лещенкод «Элст балһсна күндтә иргн» гидг цол зүүлһв. Сойлын халх делгрүллһнд ик тәвцән орулҗ олн җилдән үнн-чик седклтәһәр көдлҗ йовсн Энән Галина, Василий Хахулин болн Валерий Арутюнов «Элстд ач-тусан күргсн төлә» гидг темдгәр ачлгдв.
Байрин хургин хөөн цуһар төв талвңд болсн олн келн-улсин нәәрт орлцад, бәәрн коллективсин концерт хәләв. Дарунь энд бичкдүдин тергдин марһан болв. Эк-эцкнр эн марһанд сәәнәр белдв гиҗ келх кергтә. Эдн үрнәннь тергиг ке-сәәхнәр кеерүлҗ, бичкдүдин дурта мультфильмсин дүрмүдин хувц-хунр өмсснь олнд бахмҗ үүдәв. Тиигәд, 3-ч орм эзлсн Көкән Ника күүкнә өрк-бүл «Щенячий патруль» мультфильмин, 2-ч ормд һарсн Боован Евгения күүкнә эк-эцкнь «Пираты Карибского моря» фильмин дүрәр тергән сәәхрүләд, бийснь кеерәд марһанд орлцв. Диилвр бәрсн Лев Блудовин эк-эцкнь «Мойдодыр» тууляр тергиг кев, эднд робот-пылесос белглв.

Эн өдр бичкдүдин төлә олн зүсн керг-үүлдвр бүрдәгдсинь темдглх кергтә. «Мини Элст – мини байр», «Stepь», «K-POP evolution Fest» фестивальмуд, Г.Рокчинскийин нертә урн-билгин сурһулин күүкд-көвүдин зургудын болн балһсна сурһуль-эрдмин бүрдәцсин көдләчнрин болн сурһульчнрин һарин эрдмин кегдлмүдин һәәхүлмүд билгтә бичкдүдиг цуглулв. «Иньгллт» паркд болсн марһас әмтнд бас ик байр үүдәв. Тиигәд боорцг, тарвс дарунь иддг болн хальмг цә уудг улс дунд болсн марһас шогта-наадтаһар давулгдв. Терүнд диилвр бәрсн Максан Борисд, Дмитрий Григорукд болн Нохан Василийд сертификат белглв.
Байрин керг-үүлдврмүдиг ашлҗ асхар Диилврин талвңд бәәрн билгтнрин ик концерт болв. Хальмг Таңһчин ачта артистнр Очкан Анна, Ангелина Серова болн Һәрән Лиҗ, Хальмг Таңһчин олн-әмтнә артист Бурлака Эдуард, баахн билгтнр Цернә Эльгена, Сенькинан Мила, «Эволюция» өдгә цага бииһин академин биичнр болн нань чигн улс эврәннь билг-эрдмән эңкр балһсндан нерәдв. Балсһна һарсн өдр байрта-бахмҗтаһар болн өргәр темдглгдв.

ДООҖАН Наталья

Видео