Зун җилдән – әәмшг уга бәәдлтәһәр

24-09-2022, 21:32 | Общество, Таңһчин зәңгс

Урҗ өдр Элстд таңһчин залврин ик залд Әрәсән санитарн-эпидемиологическ цергллтин 100 җилин өөнд нерәдгдсн байрин хург болв. Терүнд Хальмг Таңһчин залврин Ахлачин үүл дааҗадг таңһчин финансин министр Шурһчин Очр, Хальмг Таңһчд ах федеральн инспектор Александр Беляев, таңһчин Улсин Хуралын (Парламентин) Ахлач Анатолий Козачко, министерствсин һардачнр, санитарн-эпидемиологическ цергллтин ветеранмуд орлцв. Хургин эклцәр таңһчин ах санитарн эмч Санҗин Җаңһр цергллтин көдләчнриг болн ветеранмудыг ончта өөнлә йөрәҗ, зун җилин эргцд делгрлтин хаалһ ямаран болсна тускар келҗ өгв.
1922 җилин һаха сарин 15-д РСФСР-ин олн-әмтнә комиссармудын хүүвин шиидврәр «Республикин санитарн органмудын тускар» гидг тогтавр батлгдсмн. Тегәд тер өдр Әрәсән санитарн-эпидемиологическ цергллт бүрдәгдснә өдр гиҗ тоолгдна.

Дәәнә өмн мана таңһчд 14 санитарн- эпидемиологическ бүрдәц, безг гемәс хөрлһнә 11 станц, олн зүсн гемәс саглуллһна Гер, садв гемәс хөрлһнә 5 диспансер үүлддг бәәсмн. Эдн цуһар социальн болн хальдврта гемәс хөрлһнә төриг хаһлдг билә. Дән эклхлә орн-нутгин барун үзгт бәәдг мүҗмүдәс әмтн нааран нүүҗ ирснә ашт таңһчд эпидемиологическ бәәдл нәрн болв. 1942 җилин эклцәр мана таңһчур 6 миңһн күн ирв, тер тоод 1,8 миңһн бичкдүд. Санитарн-эпидемиологическ болн эмнлһнә бүрдәцсин эрүл-менд харлһна көдләчнрин ач-тусар мана таңһчд хальдврта гемин эпидемь учрсн уга. Хальмг улс тууврас хәрҗ ирсн цагт 1957 җилд Хальмг автономн мүҗин санэпидстанцин һардачд Корсункин Церн батлгдв. Сиврәс нүүҗ ирҗәх хальмгуд дунд хальдврта гемәр гемтсн йовдлмуд икдв. Тер цагт эмчнр Хахлына Данил болн Екатерина, Цернә Кермн, Урхан Роза, Ивана Ольга, Бембинә Надежда чадмг кевәр саглуллһна көдлмшиг бүрдәһәд, таңһчд олн зүсн хальдврта гем түгшгог тетксмн.

Таңһчин санитарн-эпидемиологическ цергллтин делгрлтд ик тәвцән орулсн, байн дамшлтарн хувалцҗ эндрк мергҗлтнрин төлҗлтд ач-тусан күргсн ах үүрмүдин тускар Джангар Николаевич бүләнәр келв. Эндр Роспотребнадзорин болн «Хальмг Таңһчд гигиена болн эпидемиологин төв» гидг ФБУЗ-д көдлҗәх улс ниитә кевәр үүлдҗ, хамдан нөкцҗ көдлнә. 2020 җиләс авн пандемий эклсн цагас авн эдн ут тоодан 157 миңһ һар шинҗллт кев, коронавирусн гемәс хөрлһнә кергт ик тәвцән орулв.

Байрин хургт орлцсн күндтә гиичнр цергллтин ветеранмудт болн көдләчнрт үнн-чик седклтәһәр көдлҗ таңһчд эпидемиологическ әәмшг уга бәәдл теткҗәх төләднь ханлтан өргв. Таңһчин Толһач Хаска Бату илгәсн йөрәлин бичгиг таңһчин залврин Ахлачин үүлд дааҗадг Шурһчин Очр олнд умшв. Әрәсән санитарн-эпидемиологическ цергллтин 100 җилин өөнд нерәдҗ кесг көдләчнрин күч-көлсн өөдән ачлврар темдглгдв. Тедн дунд Сергей Савченко, Болдра Татьяна, Җавруна Валерий, Шашлин Евгения, Утнасна Ирина, Бембин Елена болн Онена Евгения «Роспотребнадзорин ачта көдләч» гидг темдгәр, Француза Анатолий, Манкира Валентина, Мучкан Галина, Пүрвән Хүрмә болн нань чигн улс «Әрәсән санитарн-эпидемиологическ цергллтин 100 җилин өөн» гидг медаляр ачлгдв. Таңһчин билгтнр байрин хургт орлцҗ еңсг сәәхн дууһарн седкл байсав.

ДООҖАН Наталья

Видео