Сурһульчнр багшин неринь туурулна

20-10-2022, 10:21 | Общество, Таңһчин зәңгс

Багшин эрдм даңгин олна оньгт бәәнә. Мана күүкд-көвүдт медрл өгч, җирһлин хаалһд орулҗах улсин эрдм нег үлү икәр күндлгддг бәәсмн. Селәнд багш, эмч, совхозин һардач, селәнә Советин ахлач – хамгин күндтә улс бәәсн цагиг мадн мартад угавидн. Сүл цагт багшин тоомсриг өөдлүллһәр баһ биш көдлмш кегдҗәнә. Федеральн йосна халхар багшнриг урмдуллһар, теднә сурһмҗин халх көдлмшиг дөңллһәр кесг керг-үүлдвр батлҗ авв. Орҗах җил багшин җил гиҗ зарлгдхмн.

Бидн болхла эндр хальмг келнә багшин тускар цөн үг келхәр бәәнәвидн. Светлана Андреевна Окунова Элст балһсна 8-ч тойгта дундын сурһульд багш болҗ көдлнә. 1996-ч җиләс нааран Светлана Андреевна хальмг кел болн урн үгин зокъял дасхҗ көдлҗәнә. Школын һардврин үнллһәр Светлана Окунова көдлмшән ик даавртаһар кедг, седвәр һарһҗ үүлддг багш болҗана. Хальмг келндән йир хару эн багш эврәннь дурн-седклән сурһульчнртан дасхҗ чадна. Эврә келән сәәнәр медлһн кезә чигн кергтәһинь, багшин бийиннь үлгүрәр күүкд-көвүд медҗ авна. Сурһульд кичәлд заасн тоотан батлад, цуг сурһулин үүлдврт, олна җирһлд сурһульчнран Светлана Андреевна орлцулна. Тер учрар энүнә сурһульчнр класст, сурһульд, балһснд болҗах йовдлмудар соньмсч, кесг тоотднь орлцҗ, седвәртә болҗ өсчәнә. Бидн Светлана Андреевнала редакцд таньлдвидн. Сурһульчнрнь бичсн материалмудыг эн авч ирсн бәәҗ. Урднь чигн Светлана Андреевна эднә сурһульд болҗах кесг үүлдврмүдин туск зәңгс авч ирдг бәәсмн. Давсн зун җилин 60 - 80 җилмүдт газетин умшачнр бийснь оларн бичдг билә. Хамгин олн бичгүд багшнрас ирдг бәәсмн. Газетин көдләчнрин болн газетд бичдг багшнрин дөңгәр таңһчд болҗах цуг тоот газетин халхст зөвтә орман олдг билә. Цаг уралан йовад, улсин җирһлд олн хүврлтс болв, зәрм багшнр ода күртл газетлә залһлдаһан бәрнә. Теднә негнь Светлана Андреевна Окунова мөн.

Хальмг ик сурһуль төгсәһәд, хальмг келнә болн урн үгин багшин цолта болсн цагас авн Светлана Андреевна багшар 36 җилин туршарт көдлҗ йовна. Элстин 8-ч тойгта школд 25 җилдән сурһульчнрт хальмг кел болн урн үгиг зааҗ йовна. Багшнрин өмн тәвгдсн цуг даалһвриг арднь орҗ күцәһәд, багш Окунова сурһульчнртан гүн медрл өгхәр шунна. Медрл заасн деерән сурһмҗ өглһнд баһ биш оньган өгнә. Кичәлд дасхсн тоотыг сәәнәр медүлхин төлә классин хөөн кегддг көдлмшт күүкд-көвүдиг орлцулна. Сурһулин материалыг цагин неквриг дахулҗ, гүн технологий олзлҗ, тер дотр УДЕ-н эв-арһиг багш кичәлдән болн классин хөөтк көдлмштән орулҗ, сурһульчнран соньмсулна. Эднь келн-улсиннь авъяс, заңшалыг сән меднә. Хальмг бичәчнрин үүдәврмүдин дөңгәр сойлын делгрлтлә өөрхн таньлдна. Көвүн күүкн болһн эврә билгтә болдгинь медәд, Светлана Андреевна теднә чадмгиг чик хаалһар залхар шунна. Сурһульчнран олн-зүсн марһанд орлцулна. Тернь тегәд дамшлт авхд, талдан седвәртә баһчудла таньлдх арһ сурһульчнртнь өгнә. Дәкәд болхла сурһульчнр медрлтә багшин һардврт юмнас әәлго ямаран чигн һазрт медрлән үзүлҗ, билг-эрдмәрн әмт авлдгиг дасна. Кичәлд медҗ авсн тоот тиигәд җирһлднь туста болдгар багш сурһулин-сурһмҗин көдлмшән бүрдәнә.

Олна үүлдврт орлцлһарн багш сурһульчнртан үлгүр болна. Хальмг радион Келн-улсин телеканалын соңсхврт, «Хальмг үнн» газетд багш Окунован белдсн материалмуд һарна. 2021-ч җилд «Мини төрскн» гидг номин-шинҗллтин, методическ болн үүдәгч көдлмш барлгдсн хураңһуд Светлана Окунован статья барлгдсмн. Тер җилд Светлана Андреевна «Мастерство и новаторство» гидг нертәһәр болсн Цугәрәсән марһана мөрәлгч ормиг эзлв. «Педагогика и психология» гидг профессиональн эрдмин Цугәрәсән марһанд чигн багш Светлана Окунован дамшлт мөрәлгч ормар темдглгдв.

Эн багшин күцәмҗтә олн җилә үүлдврнь Элст балһсна сурһуль-эрдмин заллтын дипломар таңһчин сурһуль-эрдмин министерствин, таңһчин залврин, сурһуль-эрдмин көдләчнрин Хальмг Таңһчин профсоюзин организацин Күндллһнә һашгудар темдглгдсн бәәнә. «Әрәсән Федерацин сурһуль-эрдмин халхин күндтә көдләч» гидг өөдән нериг Светлана Андреевна Окуновад 2017-ч җилд зүүлһсмн. Сүл җилмүдт багшин болн энүнә сурһульчнрин күцәмҗнь мел икдәд йовна. 2019-ч җилд Светлана Андреевнан 7 сурһульч олн-зүсн марһаст орлцҗ, мөрәлгч ормс эзлҗәв. 2020-ч җилд 5 сурһульч өөдән күцәмҗәрн ончрв. 2021-ч җил эн туст йир ик ончта болсинь заахд байрта. Светлана Андреевна Окунован 26 сурһульч таңһчд болн Әрәсәд болсн кесг марһанд күцәмҗтәһәр орлцҗ, сән медрл үзүлҗ, билгәрн ончрҗ Элстин 8-ч тойгта дундын сурһулин нериг һарһв. Багшин ямаран ик байр болн ямаран ик күцәмҗ 2022-ч җилд болхла, Светлана Андреевна Окунован сурһульчнр Цугәрәсән, нарт-делкән, таңһчин кесг марһанд нүүрлгч орм эзлҗ йовна.

Сурһульчнрин күцәмҗд багшин күч-көлсн үзгднә гисн тоолвр ямаран чик болҗахинь эн то-диг медүлҗәнә. Светлана Окунован һардврт кедү олн медрлтә, седвәртә болн олна үүлдврт орлцдг таңһчдан туста үрд өсчәхинь үзхд ик байрта болҗана.

ХӨӨЧИН Галина

Видео