Тәвн җилдән ниитәһәр бәәнә

21-01-2023, 10:55 | Общество, Таңһчин зәңгс

Орсн шин 2023-ч җил Эрднь Бембеевич болн Антонина Ивановна Балджировихнә төлә ончта гиҗ темдглх кергтә. Мел тәвн җил хооран эдн өрк-бүлән өндәлһәд, туула сарин 14-д алтн хүрмән темдглв.

Герин эзн Эрднь Балджиров күч-көлснә хаалһан трактористәр Аһшин мүҗин Пригородный совхозд эклв. Дарунь цергт мордад Красноярск крайд тусв, тенд слесарь-монтажник болҗ тосхлһна батальонд церглв. Әәрмәсн хәрү гертән ирҗ түрүләд Аһшин канатн заводт, түүнә хөөн Элстд ясврин-тосхлһна заллтд һаңнач болҗ көдлв. 1972-ч җилд Эрднь Бембеевич Көтчнрт ирҗ «Сельхозтехникд» ачта амрлһндан күртл тенд көдлсн болдг.

1972-ч җилд арвн нәәмтә Антонина Ларгина Сарпан района Деликовин нертә селәнәс Көтчнрт ирәд хувц уйдг комбинатд экләд көдлв. Юм уйдг эрдмд энүг бичкнәснь авн экнь дасхсн бәәҗ. Сиврт экнь Цаһан Босхомджиевна Ларгина өдртнь колхозд көдләд, сөөднь унтлгон үрдән асрхин төлә бәәрн улст девл, торһн эдәс бүшмүд уйдг билә.

Көтчнрә КБО-д Антонина даалһсн көдлмшиг седклән тәвҗ күцәдг төләднь баахн уячиг Сарпуль балһсна юм уйдг шишлң сурһульд йовулв. Сурһулян төгсәһәд, Антонина Ивановна Цаһан Нуура КБО-д тавн җилдән көдлсмн. Мел Цаһан Нур селәнд баахн хойр улсин түрүн харһлт учрв. Эрднь Антонина нег-негндән таасгдад, үүрлдг болв. Кен-негнәннь седкл медҗ, удлго эдн өрк-бүлән өндәлһәд Көтчнрт бәәршлхәр шиидв. Тенд Антонина уйдг комбинатд дамшлтан цааранднь хоршаҗ көдлв, 1981-ч җилд болхла Көтчнрә РАЙТОП-д ирәд, диспетчерәр пенсьтән һартл энд көдлв.

Эрднь болн Антонина Балджировихн олн җилдән үнн-чик седклтәһәр көдлсн төләднь кесг Күндллһнә темдгүдәр ачлгдсн билә. Эрднь Бембеевичд болхла Хальмг Таңһчин селәнә эдл-ахун ачта көдләч гидг цол зүүлһгдв.

Балджировихн хойр көвү өскәд, эдндән сән сурһмҗ, сурһуль өгч, чик хаалһд орулв. Ууһн Санл зөв-йос харлһна органмудын көдләч, эврәннь өрк-бүлән өндәлһәд, һурвн үртә болв. Андрей отхн көвүнь урднь түүмр унтралһна әңгд кесг җилдән көдләд, хөөннь көдлмшән үлдәһәд, эк-эцктәһән герин хашадан мал асрҗана. Эндр Балджировихнә эдл-ахуд үкрмүд, такас асргдҗана. Хаврин-зуна кемд Антонина Ивановна һарудт өдрән давулна. Кесг тәрә-темс, цецгүд суулһдан дурта, альмна болн чи модта сад бас бәәнә. Зунар-намрар үвлд белдәд, темснәс әмтәхн шүүс болн талдан кесг сенр тоот кенә. Иим ик эдл-аху бәрхд эк-эцкдән көвүднь, бернь, ачнрнь даңгин нөкд болна. Ачнрнь ээҗин һуйрин зүүтә әмтәхн кегдлмүдт йир дурта.

Терүнәс нань Эрднь болн Антонина Балджировихн района болн селәнә керг-үүлдврмүдин шунмһа орлцачнр болдгиг бас темдглх кергтә. Антонина ду дуулхдан йир дурта. Байрта йовдл учрхла нег уульнцд өөрхн бәәдг улсла хамдан темдглҗ, дууһан дуулҗ, сергмҗтәһәр цаган давулна. Дәкәд болхла Антонина Ивановнан келсәр, бемб өдр болһн авальтаһан эдн Андрей Малахов долан хонгин чилгчәр давулдг телеүзлин һарциг теңкән угаһар күләнә. Һарцин йовудт орлцачнрла хамдан урдк цагин дуд дуулна, тер саамд баһ цаг тодлгдна гиҗ эн келнә.

Амрлһна болн байрин өдрмүдт Балджировихнә ик, өнр-өсклң өрк-бүл хамдан цуглрад, төгрг ширә эргәд, ээҗин чансн шимтә хот эдлҗ, үрднь, ачнрнь күцәмҗсин тускар келҗ, аав-ээҗдән байр-бахмҗ үүдәнә. Амуланга ач күүкнь Әәдрхнә медицинск ик сурһульд сурна, Бадм Хальмг ик сурһулин оютн, Эрднь болхла дөрвдгч классин сурһульч болна. Хойр көвүнь, һурвн ачнь эк-эцкәсн, аав-ээҗәсн даңгин үлгүр авч, эдн тәвн җилдән яһҗ кен-негнәннь үгд орҗ, ниитәһәр бәәсн тускар даңгин соньмсад сурна. Җил ирвәс өөрхн улс болад, нег-негән дөңнәд, эм-ээмән түшлдәд, тәвн җил яһҗ давснь медгдсн уга, гиҗ Эрднь Бембеевич болн Антонина Ивановна келнә. Эндр олн элгн-садн, хамдан көдлҗ йовсн үүрмүд дунд Балджировихн күндтә, тоомсрта бүлд тоолгдна. Шидр эднүр олн гиичнр ирәд, алтн хүрмин ончта өөнләнь йөрәв. Көтчнрә ЗАГС-т Балджировихнә өрк-бүлиг темдглҗ, района һардвр йөрәҗ белгәр ачлв.

Алтн хүрмән темдглсн Эрднь Антонина хойрин келсәр, тәвн җилин туршарт күнд, амр биш йовдлмудыг мартҗ, зуг байрта тоотыг санандан үлдәҗ бәәнәвидн гив.

КАРСАНА Евгения

Видео