Сән чинртә кегдлмүд кеҗ һарһна

28-01-2023, 23:03 | Общество, Таңһчин зәңгс

Көдлмш уга улст эврә керг эс гиҗ онц эдл-аху бүрдәҗ, олзта-орутаһар үүлдҗ өрк-бүлән теҗәхин төлә социальн бооца батллһна көтлвр туслна. Хальмг Таңһчин социальн делгрлтин, күч-көлснә болн көдлмшәр тетклһнә министерствин зәңглсәр, давсн җилд мана таңһчд 660 өрк-бүл социальн бооца батлв. Эднәс 82 өрк-бүл ЛПХ бүрдәҗ мал асрад, бийән үсәр, махар, тосар теткдг деерән үлүһинь хулдад ору авчана. Социальн бооца батлсн улс дундас 251 күн эврә керг бүтәв, эдн парикмахерск, хувц уйдг, көлгн ясдг, өлг-эд кедг цехмүд секв, һаңначин туслмҗ күргҗ тааста кергән делгрүлҗәнә.

Яшкуль селәнд бәәдг Оппан Нимгр өлг-эд кедг цех секәд, бас олзта-орутаһар көдлҗәнә. Эн бийнь һартан эвтә, олн зүсн кегдлмүд кеҗ һарһна, тегәд ямаран халхар эврә керг бүтәхин тускар удан ухалсн уга. 1999-ч җилд эн цааҗ-күцәгч халхар үүлдҗәсн үүлдврт испектор болҗ күч-көлснә хаалһан эклсмн. Хөөннь Нимгр Цебекович офицерин үүлд орв. Эн цехд тротуарн плитк, үүд-терз, өлг-эд кеҗ һарһдг, мод эд-бод кедг билә. Ачта амрлһнд һарсна хөөн эн Краснодарск крайд эд-тавр кеҗ һарһдг фабрикд көдлв, тенд бас байн дамшлт хоршаҗ авв, тегәд хәрҗ ирхләрн төрскн Яшкуль селәнд эврә керг бүтәхәр шиидв. Социальн бооца батлҗ эврә керг делгрүлҗ болхин тускар соңсад, залу күн района әмтнә социальн харслтын цергллтд ирәд, ирлцнгү цех секхәр седҗәхән медүлв. Энүнә төсвиг дөңнәд, социальн бооца батлсна дару кергән эклхд кергтә мөңг йилһҗ өгв.

– Социальн бооцаһар йилһсн мөңгәр би мод эд-бод кедг кергсл кеҗ һарһхд кергтә материал болн эв-арһс хулдҗ авлав. Эврәннь гаражд көдлмшин төлә цуг таал тогтаҗ, мастерской секәд, түрүн кегдлмүд кеҗ һарһлав. Түрүләд таньл-үзл улс, хам-хоша бәәдг әмтн ямр нег өлг-эд кехиг сурдг бәәсн болхла, хөөннь района сурһуль-эрдмин, эмнлһнә бүрдәцсәс эрлһс орҗ ирдг болв. Ода мини кесн кегдлмүд района эмнлһнд, сурһульмудт бәәнә, эн рынкин үнәс 20-25 процентд кимд болна. Иргчдән бидн немр цех секҗ үүлдврән делгрүлх санатавидн, – гиҗ Нимгр Цебекович келнә.

Урднь Оппан Нимгр кесг бүрдәцслә залһлда бәрҗ үүлддг билә. Тер цагт батрсн үр-иньгин залһлдан эврә керг бүтәсн цагт керглгдв. Тиигәд Аһш балһснд үүлддг «Волга Плит» бүрдәц энүг кергтә кегдлмүдәр болн материалар теткнә. Энүнлә хамдан көдлҗәсн нег таньл сән һаңнач болҗ олн зүсн кегдлмүд кедг эрдмтә, тегәд тер бас социальн бооца батлҗ эврә керг секхәр зуралҗана. Иргчдән эдн хамдан нөкцҗ үүлдҗ, мод болн төмр олзлҗ ке-сәәхн эд-тавр кедг болх чигн биз.
Ямаран чигн керг күцәхд сән нөкднр кергтә болдг. Урднь лавкчар көдлҗәсн Александра Викторовна авальнь герин эзнд дөң болҗ өрк-бүлин керг делгрхд тусан күргҗәнә. Әмтнәс орҗ ирсн эрлһсиг диглҗ, олн зүсн бәрмт цаас белднә. Арвн зурһата Анна болн арвта Маша күүкднь бас эк-эцкдән чадсарн нөкд болхар шунна. Отхн Богдан ода чигн бичкн, көвүн дөнтә, өсәд-босхларн эн бас нөкд болхнь лавта.

Эврә керг бүтәҗ шиңкән үүлдврән эклсн цагт Нимгр Цебекович хамгин түрүнд бичкн көвүндән сандл, өрк-бүлдән ширә, тагт кев. Шин кергсл олзлҗ түрүн кегдлмүдән кеҗ үзснә хөөн эн әмтнд өлг-эд кедг болв. Ода ямр нег өлг-эд хойрдад-һурвдад кехиг сурсн улс бәәнә. Түрүн кегдлнь таасгдна хөөн әмтн дәкәд ирнә эс гиҗ таньл улсиг дахулҗ терүнд өлг-эд кехиг сурна. Яшкуль селәнд үүлддг сурһуль-интернатд Оппан Нимгр кесн олн зүсн кегдлмүд бас бәәнә, эдн цааранднь чигн хамдан үүлдхәр зуралҗана.

Нимгр Цебековичин келсәр, ода эн ниигмин сүлҗәнд эврәннь кегдлмүдин тускар олнд медүлҗ, әмтн ямаран өлг-эд таасчахиг медҗ авхар седҗәнә. «Мана кегдлмүд сән чинртә, ке-сәәхн болн өдгә цага некврлә ирлцх зөвтә гисн күсл би тәвҗ үүлдҗәнәв. Мөңгнәс сән нерн үнтә болдгиг би меднәв. Тегәд нерән өөдән бәрхин төлә күн болһна тааслтыг болн неквриг учртан авч сән чинртә эд-тавр кех кергтә. Кергән даавртаһар болн үнн кевәр күцәхлә мана керг делгрх гиҗ санҗанав. Көдлмш уга улст социальн бооцан эврәннь керг бүтәхд дөң болҗана. Мини өрк-бүл намаг дөңнҗәхнь нанд ик урмд өгнә», – гиҗ Нимгр Цебекович келнә.

ДООҖАН Наталья
ЗУРГТ: Оппан Нимгр эврә цехдән

Видео