ХОНЬНА МИХАИЛЫН ҖИРҺЛИН БОЛН ҮҮДӘЛТИН ОНЦ

30-01-2024, 14:00 | Общество

Хальмгин нертә шүлгч, бичәч Хоньна Михаил 1919-гч җилин туула сарин нег шинд Бah Дөрвд нутгин Цahaн нyp хотнд угатя малчин өрк-бүлд төрҗ. Күцц биш дунд сурһуль Цаһан Нур селәндән төгсәһәд, 1934-ч җилд Әәдрхнә Бройдон нертә Хальмгин билг-эрдмин техникумд орад, 1936-ч җилд төгсәҗ. 1935-гч җилд түрүн «Адуч» гидг нертә шүлгнь «Улан хальмг» газетд барлгдҗ, умшачин оньгт тодлгдҗ.

Бас тер кемд бичсн түрүн нааднь «Улан баһчуд» газетд һарад, драмтеатрин сцен деер 1937 җилд тәвгдҗ, олн хәләһәчнрт үзүлгдв. 1936–1939 җилмүдт Михаил Ванькаевич Элстд Хальмг государственн драмтеатрин артист болҗ көдләд, тер цагт чигн Таңһчин радиокомитетин диктор болла. 1939–1941 җилмүдт Улан Цергин Забайкальск цергин округин 646-ч стрелков полкт, 152-ч стрелков дивизьд церглҗ, баһ лейтенантын цолта болсмн. Дән эклхлә, Западн фронтын Смоленск областин Демидов балһсна эргнд стрелков взводын командир болҗ, фашистнрлә дәәллдҗ. 1942–1944 җилмүдт Белоруссин һазрин Могилевск областин Березинск района Журовка, Боровой Мост болн Местино гидг һазрмудт туршулчнрин багд орлцҗ, ротын командир болад, Миша Черный партизан алдр нерән дуудулсмн.
1944–1950 җилмүдт Сиврин һазрт Красноярск крайин Назаровск района Ададым станцин болн дәәнә тосхлтын 546-ч әңгин сурһульмудын военрук, геологоразведочн партин тетклһнә ахлач, 540-ч тойгта дәәнә тосхлтын көдләч болҗ үүлдсмн. 1950–1957 җилмүдт Алтайск крайин «Рубцовский» совхозин прораб, Локтевск района Успенск элеваторин тосхлтын инженер болҗ көдлсмн. Тер һундлта җилмүдин амлҗ болшго күчр ик зовлңд тесәд, догшн хату үүл дааһад, даргдл уга олн әмтнлә хамдан хальмг һазртан хәрү бууҗ ирлә.
(полную версию статьи можно посмотреть в бумажной версии выпуска № 9 (18991) 30 января 2024 года, ВТОРНИК)

ЛИҖИН Мингиян, Хальмгин ик сурһулин хальмг келн-бичгин болн дорд үзгин шинҗллтин күрәлңгин һардач

Видео