Хоньна Михаилын төрскнч седклин үүлдвр

21-03-2024, 15:31 | Общество

Хальмг шүлгләнә өдриг Хальмг госуниверситетд йир соньнар темдглв. Таңһчин ик сурһулин хальмг келнә бичгин болн дорд үзгин шинҗллтин күрәлңгд оютнрла хамдан, дунд сурһулин багшнр, дегтрин саңгин көдләчнр, олна үүлдәчнр цуглрҗ ирв. Энд болсн төгрг ширә Хальмг улсин нертә бичәч Хоньна Михаилын үүдәлтд нерәдгдв. Бичәчин 105 җилин өөнлә ирлцүлҗ кесн төгрг ширән сүүрт Хоньна Михаилын олн халхта үүлдврин тускар тохнята күүндвр болв. Эн күрәлңгин кафедрин һардач, профессор Дәкин Раиса төгрг ширән сүүриг һардҗ давулв. Хальмг келнә бичгин болн дорд үзгин шинҗллтин күрәлңгин һардач Лиҗин Мингиян Хоньна Михаилын намтрин болн урн-үгин үүлдврин туск илдкл кев.

Хальмгин утх-зокъялын тууҗд үлдсн Хоньна Михаилын үүдәврмүд үнтә зөөр болҗахинь темдгләд, Мингиян Алексеевич бичәчин намтрла, бичәчин олн халхта урн үгин үүлдврлә цуглрсн улсиг таньлдулв

Бичәчин җирһл хальмг улсин җирһллә өөрхн залһлдата бәәсиг Мингиян Алексеевич үзүлв. Зөргтә дәәч, нер һарсн партизан төрскн улсин хөв-кишгиг хувалцад, Сиврин тууврт туссмн. Тенд 1944–1950 җилмүдт Красноярск крайин Назаровск района Ададым станцин болн дәәнә тосхлтын 546-ч әңгин сурһульмудын военрук, геологическ хәәврин партин тетклһнә ахлач, 540-ч тойгта дәәнә тосхлтын көдләч болҗ Хоньна Михаил көдлҗ йовв. 1950–1957 җилмүдт Алтайск крайин «Рубцовский» совхозин прораб, Локтевск района Успенск элеваторин тосхлтын инженер болҗ көдлсмн. Тер һундлта җилмүд давсн хөөн, Хальмгудын нерн цеврлгдәд олн әмтнлә хамдан Хоньна Михаил хальмг һазртан байрта седклтә ирнә. Таңһчан босхҗ авлһнд шунҗ эн орлцв.

(полную версию статьи можно посмотреть в бумажной версии выпуска № 28 (19010) 21 марта 2024 года, ЧЕТВЕРГ)

ХӨӨЧИН Галина

Видео