Мәәдр гегәнә бурхн Эрмитажд

28-03-2024, 11:00 | Общество

Иргч цагин бурхн болгч Мәәдр гегәнә көшә Эрмитажд орҗ ирсн йовдл чинртә гих кергтә. Моңһлд XIX зун җилд кевлҗ кегдсн Мәәдр гегәнә көшә ода тиигәд олн улсин оньгт тусхагдҗана.

Музейд бурхна дүртә көшә авч ирхд, тернь удан цаг болад, зөвәр эвдрәд бәәснь медгдв. Музеийин мергҗлтнр терүг хойр җилдән ясад шинрүллһнә көдлмш күцәв.

Ясврин көдлмш төгсснә дару бурхиг шинәс әмрүлх кергтә болв. Гунзэчойнэй Петербургин дацңгин ламнр ирҗ шаҗна тер үүлдвриг күцәв. Дацңгин ах багш Буда Бадмаев тедниг толһалҗ ирв. Мәәдр гегәнә дүриг шинрүлҗ, олна оньгт тусхалһн ик евәлтә керг болҗана гиҗ ах багш темдглв. Бурхна дүртә болн шаҗна әрүн чинртә нань чигн үүлдвриг күцәлһн цуг орн-нутгин кемҗәнд оюни ик өөдмд күрх таал учрдгин тускар Буда Бадмаев келв.

Эрмитажин һардач Михаил Пиотровский Мәәдр гегәнә көшәг әмрүлҗ, олна оньгт һарһсн чинртә йовдлыг темдгләд, музеймүдын үүлдврин будда шаҗна көтлврин шин девсң эклҗәхин тускар зәңглв. Эн көтлвр кесг әңгәс тогтна. «Эндр музей Дорд болн Деед үзг хоорнд залһлда батлх көдлмш кеҗәнәвидн, - гиҗ Пиотровский келв. - Улан-Удэ балһснд һәәхүл кегдхмн. Иволгинск дацңгин 110 җилә өөнд нерәдҗ бас нег һәәхүл кех зура бәәнә. Эн җил бидн Рерихин зургудын ик һәәхүл кехәр зуралвидн. Тиигчкәд эн һәәхүл нертә зурачин дорд үзгин цага үүлдвртнь нерәдгдхмн. Тиигчкәд зурачин үүлдврнь мел Мәәдр гегән бурхнла залһлдата. Театрин күрәлңгин оютнрла хамдан дарани керг-үүлдвр күцәх санан бас бәәнә. Үвлин нертә бәәшңгин һурвдгч давхрт Дорд үзгин галерейд нәр-наадн күцәгдхмн».

(полную версию статьи можно посмотреть в бумажной версии выпуска № 31 (19013) 28 марта 2024 года, четверг)

УШКАНА Сувсн

Видео