Нег һазра улс Хаска Батуд иткҗәхән медүлв. Уудг усар тетклһнә төр хаһлхар

21-05-2024, 15:01 | Общество, Таңһчин зәңгс, Хальмг Тањєчин Толєачин ґдр-бўр, Зіњг

Уудг усар тетклһнә төр хаһлхар
Урҗ өдр Хальмг Таңһчин Толһач Хаска Бату Целинн района Вознесеновка селәнд одв. Хальмг Таңһчин залврин Ахлачин негдгч дарук Цернә Эрдни, залврин Ахлачин дарук – таңһчин социальн делгрлтин, күч-көлснә болн көдлмшәр тетклһнә министр Өлзәтин Марина, эрүл-менд харлһна министр Саран Булат, селәнә эдл-ахун министр Һаван Тимур, ЖКХ-н болн энергетикин министр Мангута Виктория, сурһуль-эрдмин болн номин министрин дарук Натыра Антон селәнд болсн харһлтст орлцв. Гиичнриг Целинн района муниципальн бүрдәцин толһач Опин Эрдни болн Вознесеновка селәнә ахлач Ренат Аккочкаров тосв.
Хамгин түрүнд таңһчин Толһач олна дамшлтын эмчин офист одад, эрүл-менд харлһна көдләчнрлә күүндәд, шин бәәрнд тогтагдсн таал хәләв, өдгә цага эв-арһс ямр кевәр олзлгдҗахин тускар соньмсв. Келхд, энд көдлҗәдг эмч Гооган Нонна, медицинск эгчнр Анна Богданова болн Сафият Микаилова «Земск эмч/фельдшер» гидг шаңһа көтлврт орлцачнр болна. Эмнлһнә шин бәәрн нидн «Түрүн дөң күрглһнә халхиг шинрүллһн» гидг шаңһа көтлврин медлд тосхгдв. Энд бәәрн улст түрүн дөң күрглһнә, физиотерапевтическ, тәрлһнә, өдрәр эмнлһ авлһна хорас бәәнә. Селәнд ода 1761 бөдүн күн бәәнә, эднд түрүн дөң күрглһнә төлә кергсл бәәнә, эрүл-менд харлһна көдләчнр «Самсон» гидг шишлң көтлвр олзлҗ күн болһна эрүл-мендин бәәдлин туск зәңг орулна, тегәд кемр селәнәхн таңһчин эс гиҗ федеральн эмнлһнд одхла, дарунь эдн ямаран шинҗллт кесиг, ямаран эмнлһ авсиг хәләҗ болхмн. ОВОП-ин шин бәәрин өөр хуучн эмнлһнә гер зогсҗана, тегәд Бату Сергеевич терүг олзлҗ болшго болхла хамхлад, ормднь бичкдүдин нааддг талвң эс гиҗ талдан объект тосхх сүв-селвг орулв. «Мана селәдин бәәдл сәәхрәд бәәх зөвтә. Хуучн, нурад-унҗах гермүдиг хамхлад, ормднь сән таал тогтах кергтә», - гиҗ толһач келв.
Цааранднь таңһчин Толһач балһсна сән кец-таал тогталһна төсвәр тосхгдсн бичкдүдин талвң, Төрскән харсгч Алдр дәәнд орлцсн нег һазра улст нерәдгдсн бумб болн шишлң цергә керг-үүлдврт орлцад, залу-зөрмгән үзүләд әмнәсн хаһцсн баахн Антон Гайворонскийин скверт одад, эднә санл тевчәд цецгә тәвв. Дарунь эндәс цуһар йовһар селәнә сурһульд одв. Дунд сурһулин һардач Кравцова Наталья гиичнриг тосад, бүрдәцин үүлдврин тускар ахрар келҗ өгв. Келхд, энүнә өвк эцк Дмитрий Николаевич Калинин селәнә сурһулиг һуч шаху җилдән һардҗ йовсмн. Селәнә сурһуль 1960 җилд тосхгдсмн, энд бат ясвр кех болн немр бәәр тосхх кергтә. Наталья Владимировнан келсәр, бат ясврин көтлврт орлцхин төлә цуг кергтә бәрмт цаасн белн, тегәд ирх җилд энд сән таал тогталһна көдлмш эклх гисн ицл бәәнә.
Селәнә сурһульд болсн харһлтд бәәрн улс олар орлцснь темдгтә. Эннь учрта, юңгад гихлә эдн таңһчин Толһач ирсиг соңсад, эдниг үүмүлҗәх төрмүдин тускар медүлхәр шунв. Харһлтын эклцәр Хальмг Таңһчин Толһач Хаска Бату Целинн района Ялмта селәнә муниципальн бүрдәцин толһач Джанганам Казанкинад Әрәсән Президентин Ханлтын бичг бәрүлҗ өгв (зургт). Джанганам Павловнан келсәр, эн өөдән ачлвр энүнлә хамдан көдлҗәдг улсин күцәмҗ болҗана.
Харһлтын йовудт бәәрн улс хамгин түрүнд усар тетклһнә төр босхв. Эдн удан цагт усн уга бәәһәд, ик зовлң эдлҗәнә, сад-һаруд, мал бәрдг арһ уга болв, нег бочк усн 2 миңһн арслң күрнә, гиҗ эдн хувалцв. Харһлтын йовудт эн нәрн төриг хаһлх олн зүсн эв-арһ олзлх шиидвр авгдв. Селәнд хөрн җил хооран ус бурһугдсмн, зуг терүнә чинриг шинҗлх кергтә. Селәнүр усн Элстәс турваһар өггднә, балһсна өмн үзгт бәәдг РЧВ-д усна кемҗән баһрхла, нааран тернь күрхш. Бату Сергеевич ус хурадг резервуар күртл бәәдг турвас хуучрв, тедниг ясх кергтә, шин турвас углҗ тәвх кергтә, эн көдлмшиг намр күртл күцәх зура бәәнә. Тегәд цаг зуур күләх кергтә, шин турвас углҗ тәвснә хөөн усн дигтә-даратаһар ирдг болхмн, гиҗ толһач цәәлһв. «Усар тетклһнә төриг эрк биш хаһлхв. Бидн таниг һанцарн үлдәшговидн, өгсн үгән бат бәрнәв», гиҗ Бату Сергеевич келснд бәәрн улс иткәд, эн эркн чинртә төр хаһлхиг күләх болв.
Селәнәхн П.Поповичин нертә уульнцар хату девскртә хаалһ тосхлһна, сойлын герт ясвр келһнә, баһчудын төлә спортивн стадион тосхлһна, селәнд сән кец-таал тогталһна төрмүд босхв. СВО-д орлцсн Антон Гайворонскийин эк Вера Александровна көвүнәннь санл мөңкүрллһнә төр босхв. Бату Сергеевич күүкд күүнә зовлңгиг хувалцад, зөргтә дәәчин скверт эврән ирәд модд суулһх үгән өгв. Харһлтын чилгчәр Хаска Бату хөн сарин 21-д Әрәсән Президентла харһхин тускар зәңгләд, намртан таңһчин толһачин суңһврт орлцх шиидвр авв гив. Селәнә медәтнр Көкән Наталья болн Антонина Кравцова нег һазра улсин ицлиг дөңнәд, «тана эк-эцк танд Бату гиҗ нер өгснь хара биш гиҗ сангдна, тана келсн үг күцәд, та маниг хайшгот гиҗ бидн нәәлҗәнәвидн. Бидн эн селәндән хөвтә-кишгтә бәәх санатавидн. Иигәд маднла харһад, мадниг үүмүлҗәх төрмүдәр соньмсҗах йовдл ончта болҗана. Бидн танд иткҗәнәвидн, хаалһтн цаһан болтха», – гиҗ эдн келв.
ДООҖАН Наталья
Нег һазра улс Хаска Батуд иткҗәхән медүлв. Уудг усар тетклһнә төр хаһлхар
Нег һазра улс Хаска Батуд иткҗәхән медүлв. Уудг усар тетклһнә төр хаһлхар
Нег һазра улс Хаска Батуд иткҗәхән медүлв. Уудг усар тетклһнә төр хаһлхар
Нег һазра улс Хаска Батуд иткҗәхән медүлв. Уудг усар тетклһнә төр хаһлхар
Нег һазра улс Хаска Батуд иткҗәхән медүлв. Уудг усар тетклһнә төр хаһлхар
Нег һазра улс Хаска Батуд иткҗәхән медүлв. Уудг усар тетклһнә төр хаһлхар
Нег һазра улс Хаска Батуд иткҗәхән медүлв. Уудг усар тетклһнә төр хаһлхар
Нег һазра улс Хаска Батуд иткҗәхән медүлв. Уудг усар тетклһнә төр хаһлхар

Видео