Умшачнрла өөрхн залһлда бәрнә

Дегтрин саңгин Цугәрәсән өдр җил болһн хөн сарин 27-д темдглгднә. Дегтриг олн дунд тархалһна халхд көдлҗәх саяд күн эн эрдмин байран таасч тосна. Хальмг Таңһчд үүлдҗәдг кесг зун дегтрин саңгин көдләчнр чигн байрин өдрән темдглнә. А. Амр-Санана нертә Келн-улсин дегтрин саңд тогтсн авъясар умшачнрла кеҗәх көдлмшт насн-җирһлән нерәдсн ветеранмудан тевчәд, кеҗ-күцәсән дигләд, цааранднь кех тоотан темдглҗ авна.

Олн умшачнрла бат залһлда бәрлһәрн таңһчин дегтрин һол саң даңгин ончрна. Өдр болһн энд олн-зүсн керг-үүлдврмүд болна. Насарн, эрдмәрн әдл биш олн күн дегтрин саңд ирҗ, бийдән тааста дегтр олҗ авч, седклднь ирлцсн керг-үүлдврт әмтн орлцна. Бичәчнрлә болдг харһлтс, дегтрин һәәхүлмүд, умшачнрин хургуд – олн нань чигн тоот дегтрин саңд болна.
Өдгә цагт Келн-улсин дегтрин саң делгрлтин хаалһд йовх нүүрлгч тоотыг олзлҗадг сойлын бүрдәц болҗана. Элстд болн таңһчин кесг районд мобильн дегтрин саң гиһәд, умшачнрт цагин некврлә ирлцәтәһәр дөң болна.
Дегтриг ирҗ умшсн деерән саңгин умшачнр сайтын дөңгәр олн тоотыг олҗ авна. Келн-улсин дегтрин саңгин көдләчнр Әрәсән түүрвәчнрин, хальмг бичәчнрин үүдәврмүдиг то-дигин эв-арһд орулв. «Теегин герл», «Хальмгуд: зун җилмүд болн тууҗин йовдлмуд», «Хальмг келнд орчулгдсн орс үүдәврмүд» болн төрскн һазр-усна туск хамг тоотыг шин янзд орулсинь умшҗ болхмн. Нүднә харань муурсн умшачнрин төлә чигн немр дөңцлмүд белдгдсмн.
Умшачнрла бәрҗәдг залһлдан өдгә цагин эв-арһар чигн кегднә. Тиигәд олн тоотыг олзлад, дегтрин саң умшачнрин то җил ирвәс икдүләд йовна. Җирһлин ямаран чигн бәәдлд дегтр күн болһнд йоста селвгчнь болдгиг медүлдг дегтрин саңгин көдләчнр эрдмин байран темдглҗәнә. Номтнр, бичәчнр, оютнр, сурһульчнр, багшнр болн нань чигн эрдмин көдләчнр дегтрин саңгин умшачнр болҗах учрар эдниг үнн седкләсн йөрәҗәнә.

ҖИРҺЛИН Кермн