Цогц-махмудан батрулна

Җил болһн цуг нарт-делкәд скандинавск йовлһна Өдр темдглгднә. Эн җил энүг хөн сарин 18-д болн 19-д темдглв, тегәд хойр өдрин туршарт цуг нарт-делкәд әмтн цуглрад, шишлң тайг һартан авад, хамдан йовһар йовв. Мана орн-нутгт эн өдр арвн җил хооран темдглгддг болв. Мана таңһчд скандинавск йовлһар соньмсдг улсин то җил ирвәс икдәд йовхнь темдгтә.

Шидр Элст балһснд скандинавск йовлһар соньмсдг медәтнр цуглрад, хамдан «Иньгллт» паркд цаган тустаһар болн сергмҗтәһәр давулв. Ут тоодан 30 һар күн эн керг-үүлдврт орлцв. Түрүләд эдн цогц-махмудан тинилһәд, олн зүсн даалһвр күцәв. Хөөннь эдн шишлң тайг авад, скандинавск йовлһар йовв. Цевр аһар киилҗ, хамдан паркар йовснь медәтнрт байр болн сергмҗ үүдәв. Керг-үүлдврин чилгчәр чик авг-бәрцәр бәәҗ, скандинавск йовлһар соньмсдг медәтнриг Хальмг Таңһчин социальн делгрлтин, күч-көлснә болн көдлмшәр тетклһнә министерствин Ханлтын бичгәр ачлв. Дарунь медәтнриг халун хальмг цәәһәр болн боорцгар тоов.
Хальмг Таңһчин залврин Ахлачин дарук-таңһчин социальн делгрлтин, күч-көлснә болн көдлмшәр тетклһнә министр Өлзәтин Маринан темдглсәр, «Демографь» гидг келн-улсин төсвин «Ах үйин улс» гидг региональн көтлврин һол күслнь медәтнр ут нас наслҗ олна керг-үүлдврмүдт орлцҗ соньн кевәр бәәхнь болна. Мана таңһчд җил ирвәс ах үйин улсин җирһлин таал ясруллһнд туслдг төсвсин то икдәд бәәнә. Эдн цогц-махмудан батрулҗ, билг-эрдмән делгрүлҗ, хамдан сергмҗтәһәр цаган давулхин болн тааста керг олҗ авхин төлә әмтнә социальн теткврин комплексн төвмүдин улд олн зүсн клуб үүлднә. Үлгүрнь, эрүл-мендин клубд медәтнр чик авг-бәрцәр бәәҗ, цогц-махмудан батрулна, хамдан экскурсьт одна. Эдн дунд скандинавск йовлһн сән делгрлт авв. Иим керг-үүлдврт эдн шунмһаһар орлцдгнь олнд бахмҗ үүдәнә, гиҗ министр келв.
Келхд, скандинавск йовлһна нарт-делкән Өдрт нерәдгдсн керг-үүлдвр таңһчин район болһнд бас бүрдәгдв. Ут тоодан 300 медәт терүнд орлцв. Целинн районд болсн керг-үүлдврт «Серебряные волонтеры» клубин гешүд орлцад, скандинавск йовлһар соньмсдган медүлв. Түрүләд района комплексн төвин медицинск көдләч медәтнрин эрүл-менд шинҗлв. Партизанск дунд сурһулин багш Вера Тареева скандинавск йовлһнд кергтә эв-арһ ямр кевәр шүүҗ авхиг, чикәр йовдгиг үзүлҗ цәәлһвр өгв. Дарунь медәтнр цогц-махмудан батрулад, Троицкое селәнә паркд йовһар йовҗ цаган сергмҗтәһәр давулв.

БАТАН Сәәхлә