Басңга Баатрин нертә театрин төлә күцәмҗтә җил

28-05-2024, 13:07 | Общество, Таңһчин зәңгс, Зіњг, Сойл

Басңга Баатрин нертә Келн-улсин театрин дарани 87-ч кем күцәмҗтә болв. «Хальмг хүрм» гидг наадыг үзүләд, театр эн җилә көшгән хаав. Театрин художественн һардач Манҗин Борис болн һардач Шуран Галина көдлмшин ашиг дигләд, кеҗ-күцәгдсн тоотыг тодлулад, тәвгдсн нааддын, учрсн гастрольн йовлһна тускар келцхәв.
Тер өдр театрин коллектив Хальмг Таңһчин ачта артист Бадман Пүрвән өөниг темдглв. Хальмг Таңһчин сойлын министрин дарук Саңҗрһа Герман коллективиг дарани кемән күцәмҗтәһәр төгсәснләнь йөрәһәд, Пүрвән Бадмд «Сойлд күргсн ач-тусин төлә» гидг медаль бәрүлҗ өгв.
Театр 87-ч кемдән А. Грибоедовин «Ухани уршг» наадыг белдсмн. Театрин режиссер Манҗин Борис белдҗ тәвсн наадн хальмг келәр үзүлгдв. Калян Санҗ орчулсн наадар тәвгдсн үүдәвр «Ухани уршг» гидг нертәһәр олн хәләһәчнрин оньгт тусхагдла. Классическ үүдәврмүдиг тәәз деерән тәвх шиидврән театр тиигҗ күцәв. Эн наадн таңһчин меҗә һатц болсн хәләврмүдт үзүлгдҗ, талдан келн-улсин хәләһәчнрин оньгиг авлв.
Нег чинртә йовдлын тускар бас келхмн. Басңга Баатрин нертә Келн-улсин драматическ театр эн җил Әрәсән Федерацин сойлын министерств бүрдәсн келн-улсин театрмудын наадмиг эврә тәәз деерән тосч давулсмн. Бүрдәмҗин өөдән кемҗәнд давсн сойлын ик чинртә эн керг-үүлдвр театр ямаран чигн төрмүд хаһлҗ чаддгинь иткүлв.
Басңга Баатрин нертә Келн-улсин драматическ театрин коллектив җилин туршарт олн хәләврт орлцна. Эн җилин хөн сарин 16-ас авн 22 күртл театр Башкирьт болсн театральн ик хургт орлцв. Уфа балһснд келн-улсин театрмудын VIII нарт-делкән ик хәләвр болв. «Туганлык» гидг нертә театральн ик байр үүдәгч зөрүллтәрн, нөкцлтин болн иньгллтин седкләрн ирсн театрмудын коллективст тодлгдв.
Башкортостан Республикин залвр, Башкирин сойлын министерств соньн эн керг-үүлдвриг бүрдәсмн. Хальмгас ирсн Басңга Баатрин нертә Келн-улсин театр А. Грибоедовин «Ухани уршг» наад үзүлв. Мустай Каримин нертә Башкирин баһчудын Келн-улсин театрин тәәз деер хөн сарин 21-д хальмг артистнр Грибоедовин нер туурсн наадыг хальмг келәр үзүлв.
Ирлцңгү хәләвр 1991 җилд Башкортостан Республикин сойлын министерствин седвәрәр бүрдәгдсн билә. Театральн билг-эрдмин эн сәәхн байр тиигәд Уфа балһснд олн коллективсиг цуглулдг болв. Ик зуудан терүнд түрг келн-улсин театрмуд орлцҗасмн. Тууҗин, сойлын болн келнә ул деер негдсн үүдәгч коллективс хоорндан ни-эвәр бәәлһнә төлә сойлын залһлдаһан тиигҗ батлсмн.
2024 җилд эн келн-улсин театрмудын хәләвр гиҗ нерәдгдәд, терүнә кемҗән улм өргн болв. Түрг келн- улсин театрмудла зергднь энд ода талдан олн келн-улсин театрмуд билг-эрдмән үзүлҗәнә.
Хәләврин йовудт 14 наадн: Мажит Гафурин нертә Башкирск академическ драмин театрин, А. Пушкинә нертә Псковск драмин театрин наадд чигн олн-әмтнә оньгт тусхагдв. Әрәсән келн-улсин драматическ театрин әңг болн Псковск театр шишлң гиич болҗ хәләврт орлцв.
Татарстана, Казахстана, Кыргызстана, Ар үзгин Осетин - Аланя, Чувашин, Хальмгин, Абхазин, Туван, Дагестана, Марий Эл Республикин театральн коллективсин билг-эрдмлә хәләврин йовудт олн хәләһәчнр таньлдв. Әрәсән келн-улсин театрмуд эн байрт баһ бишәр орлцсинь үзҗ болхмн.
Медрлән болн мергҗлтән өөдлүлхд хәләвр ик туста болв. Әрәсән келн-улсин драматическ театр Әрәсән келн-улсин театрмудын Ассоциацин дөңгәр семинармуд, мастер-классмуд бүрдәв. Асхн болһн актерск клубмуд цуглрҗ, артистнр, театрмудын көдләчнр дамшлтарн хувалцв. Сул өдрмүдт экскурьст орлцҗ, Уфа балһсна ке-сәәхн тоотла эдн таньлдв.
«Туганлык» хәләврин ик көтлвриг Башкирск академическ драмин театр эклв. М. Гафурин нертә эн театр олна оньгт «Красный паша» гидг наадыг тусхав.
Эн хәләврт күндтә гиичнр болҗ ирсн Әрәсән улсин артист, РФ-н театральн үүлдәчнрин Ниицәнә ахлач Владимир Машковла, Әрәсән улсин артист, Әрәсән келн-улсин театрмудын Ассоциацин Хүүвин ахлачла Валерий Фокинлә харһх таал театрин коллективст бас учрв. Дәкн нег күндтә гиич Әрәсән улсин артист, Әрәсән кесг республикүдин ачта артист, профессор Рифкат Исрафиловла болсн харһлт йир соньн болв.
Театральн хәләврмүдт орлцлһн үүдәгч талдан коллективслә харһҗ, теднә нааддыг хәләҗ, цаарандк үүлдврт туслх тоотыг бийдән шиңгәҗ авлһн болна – гиҗ Басңга Баатрин нертә Келн-улсин театрин һардвр тоолҗана.
Эн учрар Хальмг драматическ театр шаңһа болн регионмуд хоорндк хәләврмүдәс дутшгоһар үүлднә. Эрдмин халхар мергҗлтән өөдлүлхд тиим харһлтс туслдгинь сәәнәр медҗ үүлднә. Эн җилин мөрн сарин 24-д Келн-улсин театрин үүдәгч делегац Ташкентд одад ирв. Узбекистана хотл балһснд хальмг артистнр режиссер Сергей Бурлаченко тәвсн «Пришельцы в виртуальном мире» гидг наадан үзүлв. Эн наадн мөрн сарин эклцәр үзүлгдсмн, элстихн терүгинь меднә.
Бичкдүдин театрмудын түрүн нарт-делкән наадмд тиигәд Хальмг театр орлцв. Ташкентд мөрн сарин 25-ас авн 30 күртл болсн эн хәләвр «Дети XXI века» гиҗ нерәдгдлә, терүнд зәңгллһнә эв-арһс өргнәр олзлгдла. Азербайджана, Грузин, Узбекистана, Беларусин, Киприн болн Әрәсән театрмуд терүнд орлцв. Узбекистана сойлын министерств болн тооллһна эв-арһсин министерств бүрдәсн түрүн болҗ иим кемҗәнд кегдсн эн хәләврт Хальмг драматическ театр орлцв.
Театрин 87-ч кем тууҗд орҗана. Шин белдҗ тәвсн нааддан театр улсин хоорндк ик хәләврмүдт орлцҗ үзүлв. Хальмгт театральн җирһл урдк кевәрн бульглад, делгрҗ йовхиг театр үүлдврәрн медүлв.

ХӨӨЧИН Галина

Видео