«Орленок» лагерьт амрад ирв

Одахн Яшалтан района А. Дурневин нертә дунд сурһулин 4-ч классин сурһульчнр Цугәрәсән бичкдүдин «Орленок» төвд амрад ирв. Эдн Хальмг Таңһчин марһанд болн Әрәсән кемҗәнд диилвр бәрәд, мана арвтнриг элчлв. Октябрьск сурһулин 4-ч классин бичкдүд нег-негән дөңнҗ амр биш цуг даалһвриг күцәв.
Ут турштан тер селгәнд цуг Әрәсәһәс 900 сурһульч болн теднә багшнр амрч, соньн дамшлт хоршав. Сурһульчнрла хамдан теднә классин һардач Нелли Сухова болн ах классин сурһульч- сурһмҗлач Мадинат Вайламатова һарч йовв.
Тер амрлһн ямаран кевәр бүрдәгдснә, бичкдүд болн теднә багшнр ямаран соньн тоот дасч авсна тускар Нелли Викторовна келҗ өгв. «Багшнрин төлә тогтасн онц көтлврин кемҗәнд бидн сурһмҗ өглһнә шин эв-арһиг даславидн, кесг регионмудын элчнр эврә дамшлтарн хувалцҗ, бичкдүдиг үүдәгч үүлдврт яһҗ орлцулхин тускар келв. 50 регионас 54 багш иигәрән ирв. Йирдән болхла, багшнрин төлә онц көтлвр күцәгдҗәлә, маднд лекц умшад, сурһмҗин кесг төрәр дамшулҗ, мастер-классмуд үзүлв. Мана сурһульчнр болхла, эврә багмудт вожатнрла хамдан бәәлә, бидн зуг асхлад хамцу керг-үүлдврт харһҗалавидн.
Мана күүкд олн үүрмүдән тенд олҗ авв, эдн талдан балһсдар, онц һазрар экскурсьт йовҗ, олн соньн тоотыг үзлә.
Спортын марһанд, олн зүсн нааднд, концертст чигн эдн бас орлцв, – гиҗ Нелли Викторовна келҗ өгв.
«Орлята России» гидг җисәнә әңг Яшалтан района сурһульмудт шунлтта кевәр үүлдҗәнә, сурһулин һардачин селвгчнр эн туст ик дөңгән күргнә.
Октябрьск сурһулин 4-ч классин сурһульчнр Нелли Викторовнан һардврт эн җил түрүн болҗ тиим марһанд орлцв. Эдн эврә һазрин экологин, тууҗин тускар кесг шин тоот дасад, нәәрүлҗ бичлһ олн төрәр бичлә, нүүрләчин авг-бәрцнь ямаран болдгинь медҗ авв.
«Мини сурһульчнр эрк биш тиим керг-үүлдврт орлцхар седҗәлә. Дәкәд сурһулин һардач, түүнә селвгч маднд тер «Орлята России» җисән зарлсн марһанд орлцх кергтә гиҗ селвгллә. Тиигәд олна дөңгәр бидн тер марһанд орлцх эрлһән йовуллавидн, һурвн сай эклц классин сурһульчнр түүнд түрүн саамд орлцв», - гиҗ Нелли Викторовна цәәлһҗ келв.
Цуг орн-нутгар 178 миңһн һар класс үүдәгч эв-арһан болн шунлтан үзүлҗәлә. Түрүләд Октябрьск сурһулин 4-ч классин баг мана таңһчин девсңд диилвр бәрлә. Тиим өөдән ашт күрхвидн гиҗ эдн нам түрүн саамд иткҗәсн уга. Цааранднь Әрәсән девсңгнь эклв. Тенд бас диилвр бәрәд, бүкл классарн Хар теңгсин көвәд «Орленок» лагерьт амрх зөв авла. Диилх седкл болн хамцу үүлдвр тиим өөдән ашта болна гиҗ келҗ болҗана.
Шүүҗ авлһна кемд эдн 3 марһанд орлцла, видеофильм цокад, эврә билг-эрдмән, күцәҗәдг керг-үүлдврән үзүллә. Тер даалһвриг күцәһәд бичкдүд ончрв. Тиим кевәр таңһчд дииләчнр болсмн. Дәкәд Әрәсән девсңд марһан болла.
Һурвдгч девсңгнь багшнрин төлә бүрдәгдв. Тенд болсн марһанд Нелли Викторовна өөдән мергҗлтән үзүлҗ диилвр бәрсмн.
Тиим кевәр Октябрьск сурһулин болн Хальмг Таңһчин бичкн элчнр классин һардачтаһан «Орленок» лагерьт хойр долан хонга амрлһан давулв. Теднә үлгүр мана таңһчин сурһульчнрт урмдта болтха!

ТҮРВӘН Һуна