Хальмг келәр толь һарв

Сүл цагт мана орн-нутгт олн келн-улсиг хамцулхин төлә аһу ик көдлмш күцәгдҗәнә. Негнь болхла, РУВИКИ нертә шин интернет толь болҗана. Эн җилин хаврар РУВИКИ-д хальмг келәр зәрм материалмуд һарв.

Мана хальмг келн мартгдҗадг кемд хальмг күн болһн хамг күчн-чидлән негдүлҗ, эврә келән, эн келәр бичәтә бәәсн урн-зокалын зөөриг чигн, өвкнрәс улмҗлулҗ авсн өвиг өсч-босчадг үйнртән дасхч медүлх дааврта бәәнә. Эн көдлмшиг өдгә цагин эв-арһсар делгрүлх керг-үүл ик чинртә болҗана. Ода ик-бичкн уга цуг әмтн интернетд орҗ, бийән әәтрүлҗ, наадад цаган үрәдгнь нуувч биш болна. Мөн тер цагт эврә келән өргҗүлх, Хальмг Таңһчин, нертә-тоомсрта әмтнә тускар йосн-йовдл, заң-бәрц чигн медх сән арһ ода учрв. Эннь Әрәсән шин толь «РУВИКИ» гидг порталыг олзлҗ авх арһ болна. РУВИКИ-д ода деерән хальмг келәр 3325 зәңг барлгдсн бәәнә. Зуг эннь адг-сүл биш, эврә келндән хару күн болһн эврә хүв-немрән орулҗ чадҗана! Мана келнд «далад дусал немр» гидг цецн үг бәәдг биший. Эн үгәс үлгүр авч, бидн, хальмгуд, хамдан негдәд-нииләд цуһар эврә келән делгрүлх арһта бәәнәвидн.
Хальмг келнә РУВИКИ сайтын тускар келхлә, цугнь тенд хальмг келәр бичәтә бәәнә. Хальмгт өврмҗтә һазрин, бурхн-шаҗна, нертә улсин намтрин болн керг-үүлин тускар эндәс медҗ болхмн. Эврә келәр умшсн материалмуд күн болһна кел улм байҗулад, соньн болн нәрн утх-чинртә медәһәр ухата улсин седклинь байрлулх юмн. Даруһас хальмг келнә статья болһниг үзг-бичгәр умшсн деерән соңсх эв-арһиг немх ухан-санан бәәнә. Тиигхлә нүднә харань муурсн улс чигн бичәтә цуг юмиг чикәрн соңсч чадхмн. Өдгә цагин эв-арһс, тер тоод РУВИКИ шин толь мана хальмг кел өргҗүллһнд сән дөңцл болх гиҗ ицх кергтә.