Селәнә улс эмчән күндлнә

Баһ Дөрвдә района Тундутово селәнә эмнлһнд давсн җилин хаврас авн баахн эмч Каарун Надежда көдлҗәнә. Энд нидн олна дамшлтын эмчин офис (ОВОП) секгдсмн, тегәд Баһ Дөрвдә района эмнлһнд көдлҗәсн Надежда Сергеевна нааран ирв. Ик сурһуль төгсәснә хөөн эн «Земск эмч» гидг көтлврин халхар района эмнлһнд күч-көлснә хаалһан эклсмн. Долан җилдән района эмнлһнд көдләд, баахн эмч ах үүрмүдәсн дамшлт хоршаҗ авв. Эмч насарн баахн болв чигн кергән йилһән сәәнәр меддг, әмтнлә тевчңгү болн килмҗтә, цаһан седклтә күн болҗахиг селәнә бәәрн улс дарунь медәд, күндлҗ энүг тевчнә.

Одахн Хальмг Таңһчин Толһач Хаска Бату районд көдлмшәр ирсн кемд Тундутово селәнә эмнлһиг хәләсн билә. Дигтә энд эмчд ирсн улс Надежда Сергеевнаг буульҗ, эднә селәнд иим сән эмч ирҗ көдлҗәхиг онц темдглв. Амрлһна өдрмүдт эс гиҗ асхн ора җиңнүлхлә, эмч эднә сурврт хәрү өгч, эмнлһнә ямр нег төрәр сүв-селвг өгнә, гиҗ эдн буульҗ келв. Медәт Антонина Васильеван келсәр, селәнд шин ОВОП тосхгдсна ашт эрүл-мендин бәәдлән шинҗлҗ, сән эмнлһ авхин төлә, сән таал тогтагдв. «Урднь эмнлһн зун һар җил хооран тосхгдсн хуучн герт бәәршлҗәсмн. Ода болхла, эмчин, тәрлһ келһнә, эм хадһлдг болн өдрәр эмнлһ авдг хорас бәәнә. Үвлднь энд дулан, зунднь серүн, иигәрән, усн орулгдв, тегәд балһснла әдл таал тогтагдв.
Селәнд ода күсдундур шаху күн бәәнә, теднәснь 242 бичкдүд болна. Ик-бичкн уга эмчин хәләврт бәәнә, цуһар җил болһн эрүл-менд шинҗллһнә керг-үүлдврт орлцна, олн зүсн гемәс саглуллһна тәрлһ авна. Келн-улсин төсвәр селәнд тосхгдсн эмнлһнд олн зүсн кергсл бәәнә. Гемтсн күүнд эмнлһ келһнд талдан эмчнрин сүв-селвг кергтә болхла, Надежда Сергеевна дарунь таңһчин эмнлһнә мергҗлтнрлә залһлда бәрҗ, теднлә селвлцнә. Тегәд цаган үрәлго гемтә күүнд дарунь эмнлһ эклҗ, әминь аврҗ болна. Өдгә цагт телемедицинә эв-арһ өргнәр олзлгдҗахас иштә селәнә улст түргн дөң күрггднә.
Тундутово селәнә эмнлһнд медицинск эгч Виктория Полякова болн Людмила Касанова хойр көдлҗәнә, эдн селәнә бәәрн улст тәрлһ кеҗ, эмнлһнә керг-үүлдврмүд күцәнә. Виктория зурһан җил хооран Аһш балһснд медколледж төгсәснә хөөн төрскн райондан күч-көлснә хаалһан эклсмн. Күүкн экиннь үлгүрәр эрүл-менд харлһна көдләчин эрдм шүүҗ авсмн. Экнь Татьяна Ивановна района эмнлһнә ах медицинск эгч болна. Һучн һар җилдән эрүл-менд харлһна халхд көдлҗ байн дамшлт хоршав. Күүкнь энүнә үлгүрәр эрдм шүүҗ авснь Татьяна Ивановнаг бас байрлулв. Людмила Касанова болхла, дамшлтта мергҗлт, эн хөрн һар җилдән района эмнлһнд көдлҗ йовна. Эн җилмүдин эргцд эн рентгенолог, дунд сурһулин болн бичкдүдин садын медицинск эгч болҗ үүлдв, эн җиләс авн Тундутово селәнә эмнлһнд көдлҗәнә, Байрта дү күүкнь невролог эмч, Заяна дү күүкнь бас медицинск эгч болна.
- Би бичкнәсн авн эмч болхар шиидләв. Мини наһцх Василий Оконович Дорджиев хирургар олн җилдән көдлҗәнә, тегәд терүнәс үлгүр авснь тер. Долан җилдән тааста эрдмәрн көдлҗ, әмтнд дөң күргҗ йовнав. Эн селәнд ирәд, негхн җил болсн бийнь иҗлдәд, бәәрн улсла сәәнәр таньлдув. Энд олн келн-улс хоорндан ниитәһәр бәәнә. Бичкн селәдт бәәдг улсин төлә иим сән таал тогталһна, гертән эмнлһ авлһна төлә кергсләр тетклһнә төрмүд хаһлгдҗахнь көдлмшән улм сәәнәр күцәхд омг өгнә, - гиҗ Надежда Сергеевна темдглнә.

ДООҖАН Наталья
ЗУРГТ: Тундутово селәнә эмч Каарун Надежда көдлмштән