«Бумбин орнла» таньлдв

Хальмгин төвд зуульчллһна болн төрскн һазр-усан даслһна ниицәс үүлднә. Терүнд орлцдг баһчуд шидр «Бумбин орн» гидг зам хаалһар экскурьст одад ирв.

Энд күүкд-көвүд хальмг ишкә герт орҗ, терүнд бәәдг өлг-эд соньмсч хәләв. Дарунь эдн саадгар халһнд орлцв. Темә унад, теегәр йовсан эдн йосндан мартшго болв.
Хар Һазра районла цааранднь таньлдад, элсн нүүдг бәәрнд күрәд, соньн олн тоот медҗ авв. Хагсу өдрмүдлә салькн көдлсн цагла элсн көндрәд, хамтхасн шурҗңнад унҗахла әдл ә һарһдгнь әмтнд даңгин өврмҗтә болна. Йиртмҗин өвәрц иим йовдлла зуг элсн элвг һазрт таньлдҗ болна.
Хальмг теегт бәәдг соньн олн тоотла, йиртмҗин кеерүл болн өвәрц бумб болҗадг «Бумбин орнла» таньлдад, баһчуд төрскн һазрин өвәрцин тускар ирсн гиичнрт болн олн зуульчнрт келҗ өгхәр бәәнә.

ҖИРҺЛИН Кермн