Өдгә цагин эдмәр сурчана

Эндр мана орн-нутгт болн цуг регионмудт шин эв-арһст, роботмудыг улм өргнәр олзллһнд ик оньг өггдҗәнә. Түүнлә дегц тер өдгә цагин салврар инженермүдиг болн программистнриг белдлһн ик чинр зүүдг болв, иим эрдмәр вузмудт болн колледжмүдт олар баһчудыг орулҗ авхар зуралҗана.

Тер төрмүдлә ирлцүлҗ, мөчн сарин 3-д Элстд арвтнрин төлә IT-сурһуль секгдв. «Тооһин шин эв-арһ олзлдг Хальмг Таңһч» гидг IT-кластерин ул деер һурвн җилдән шин бүрдәц көдлҗәнә. Эн җил зуна цагин сурһульд күүкд түрүн болҗ өңгәр сурх», – гиҗ мана зәңгчлә кесн күүндврин йовудт IT-кластерин һардач Аркадий Муниев келҗ өгв.
Тер мет то-дигин заллһна систем тогтаһач, «Postgres Professional» гидг нүүрлгч компань сурһулин бас нег бүрдәһәчнь болҗана. Мана таңһчин төлә шин болн ик кемҗәтә төсв күцәҗәх седвәрчнь – Элстин бәәрн күн, МГУ-н физикин дацң төгсәсн астроном Олег Бартунов, ода «Postgres Professional» компаня бүрдәһәч болн һардач болҗ үүлдҗәнә. Энүнә эцкнь Сергей Очир-Гаряевич Бартунов кесг җилдән «Хальмг үнн» газетд әңгин һардачар көдлҗәсмн.
Туслң «Postgres Professional» компаня дөңгәр Элстд 6-11-ч классмудын сурһульчнрин төлә мөчн сарин 3-ас авн ноха сарин 23 күртл IT-сурһулин ул деер зурһан селгән бүрдәгдхмн, 240 сурһульч энд өдгә цагин медрл авх.
«Бидн кергтә дамшлт хоршаһад, тиим зуни цагин лагерин төлә шишлң көтлвр үүдәхәр зуралҗанавидн. Мана хоршасн дамшлтыг орн-нутгин талдан регионмуд олзлҗ эн төсвиг улм ик кемҗәтәһәр тархах арһ учрҗана», – гиҗ Аркадий Михайлович келнә.
Селгән болһнд IT-лагерьт 40 күн сурхмн, эдн Элстәс болн райодас ирсн бәәнә. Арвтнрт иим амрлһн икәр гидгәр таасгдҗана, тиим кевәр нааран орх саната көвүд-күүкд баһ биш, зәрмнь нам түрүн селгәнд орҗ чадсн уга. Эдн зәңгллһнә олн зүсн эв-арһ дасх, мана орн-нутгин IT-салврла болн тооһин эрдмлә таньлдхмн.
Түүнәс нань арвтнр программированя Python келнә ул-сүүринь дасх, то-дигин ул-сүүриг тогталһна эв-арһла таньлдҗ, дамшлтта мергҗлтнрин һардврт эврә түрүн көтлврән үүдәхмн.
«Сурһульчнр IT-вузмудт ортха, зәңгллһнә эв-арһсин салврин эрдм дасч автха, – гиҗ бидн күсл тәвҗәнәвидн, түүнә төлә шишлң сурһульмуд болн лагерьмүд секчәнәвидн. Мана дөңгәр авртнр эрдмән болн кергтә вузан эртәснь шүүҗ авад белдврән ясрулх», – гиҗ Аркадий Михайлович күүндврин йовудт онц темдглв.
Сурһульчнрин төлә лагерьт талдан чигн соньн керг-үүлдвр бүрдәгдх, хот-хоолар чигн эдн теткгдх. Элстин сурһульмудын багшнр энд арвтнриг дасхх. Түүнәс нань «Postgres Professional» компань-спонсорин элчнр ирх гиҗ күләгдҗәнә, эдн IT-технологийәр шишлң кичәл өгх.
IT-лагерь экләд үүлдҗәнә, арвтнр шин медрл авсн деерән энд сәәнәр амрчана, тиим туста амрлһн эднд болн эднә эк-эцкнрт икәр таасгдҗана.
ТҮРВӘН Һуна