билг-эрдмән үзүлв

Таңһчин цуг сурһульмудт мет, зуни түрүн сарин эклцәр Элстин олн салврта гимназьд «Хөөтк үй» гидг өдрәр көдлдг лагерь секгдлә. Ода тенд 1-6-ч классмудт ордг күүкдин 8 баг үүлдҗәнә. Баг болһн эврә нертә, дуудврта, нань чигн авъяста.
Лагерь секлһнә байр бичкдүдт болн арвтнрт икәр тодлгдв. Цуг багмуд эврә билг-эрдмән үзүлв. Бииләд, домбр цокад, ду дуулад, көвүд-күүкд белдсн концертән үзүлв.
- Маднд лагерьт бәәлһн таасгдна, энд бидн олн зүсн керг-үүлдврт орлцҗ, марһа, наад бүрдәҗ цаган тустаһар давулнавидн, – гиҗ күүкд келнә.
Нам таңһчин залврин гешүд ирәд эднд соньн тоот цәәлһҗ өгнә. Тиим керг-үүлдврт ах классин сурһульчнр чигн орлцна. Үлгүрнь, одахн таңһчин тооһин делгрлтин министр Алексей Этеев ирҗ күүндвр келә.
«Интернет хулд-гүүлгәнд олзлдг эв-арһ» гидг төрәр ил кичәл министр өгв. Ода цугтан гилтә Интернет-лавкд тааста юм авна. Тегәд эн төр бичкдүдт болн арвтнрт йир соньн болснь лавта.
Сурһулин лагерьт цаган давулҗадг 7-8 классмудын арвтнр бас эн керг-үүлдврт орлцв. Программистин, аналитикин, тестировань кедг мергҗлтин эрдмин тускар келәд, электронн хулд-гүүлгән яһҗ күцәгддгин тускар министр тодрхаһар келҗ өгв. Тер мет маркетплейст олзлдг эв-арһла таньлдулв. Министрин келсн тоот сурһульчнриг икәр соньмсулв, эдн кесг сурвран өгв.
- Эндр кесг улс эврә җирһлән IT-эрдмлә залһлдулхар седҗәнә. Эн салврт соньн кесг үүлдвр күцәҗ болхин тускар бидн дорас өсчәдг үйнрт келҗ өгх зөвтәвидн. Өөрхн иргчд эндрк сурһульчнр эврә эрдмән, мергҗлән шүүҗ авх, тер цагт эртәс хоршасн дамшлтнь болн медрлнь чик шүүвр кехд эрк биш дөң болад бәәх гиҗ министр темдглв.
Эн кичәлин чилгчәр сурһульчнр министрин һардврт онлайн тренажер яһҗ көдлдгинь үзҗ тер дамшлтын кичәлд түрүн эв-дован хурцдулв. Тиим кевәр энд эврә интернет-лавк бүрдәлһнә туск селвг авч, авсн медрлән батрулв.
Тиим тооһин кичәл мана таңһчд 2018 җиләс авн «Әрәсән тооһин экономик» гидг төсвин кемҗәнд күцәгдҗәнә. Эн җилин сурһулин җилин эклцәс нааран таңһчин арвтнрин төлә тооһин 9 кичәл өггдв болн ликбез бүрдәгдв, тиим кевәр эн җисән таңһчд делгрлт авад йовна. Уйн наста арвтнр шин эв-арһсин туск медрлиг түргәр тодлҗ авна.
Тиигҗ олн зүсн медрл, эв-дов хоршаҗ, бичкдүд Элстин ЭМГ-н «Хөөтк үйнр» лагерьт бәәнә. Одахн энд өрк-бүлин җилин йовудт бас соньн керг-үүлдвр болв. «Бидн хамдан билгтәвидн» гидг өрк-бүлин марһан болв. Джалсановихнә болн Болаевихнә хойр өрк-бүл энд билг-эрдмән үзүлв. Түрүләд хойр хамцулын элчнр йөрәлин үгән келв. Дәкәд эдн хәләһәчнрин оньг авлдг марһаст орлцв.
Цугтаднь тер дөрлдән таасгдв. Өрк-бүлмүдин элчнр Күндллһнә һашгудар болн үнтә белгүдәр ачлгдв. Сурһмҗлачнр хойр өрк-бүлин билгтнрт ханлтан өргв. Талдан чигн кесг марһас лагерьт ордг күүкдиг күләҗәнә.
ТҮРВӘН Һуна