Сурһульчнр көдлҗәнә

Җил ирвәс мана таңһчд амрлһна кемиг тустаһар давулх саната бичкдүдин то өсәд бәәнә. «Демографь» гидг келн-улсин төсвин «Хальмг Таңһчд күч-көлс харлһна, таал ясруллһна болн әмтиг көдлмшәр тетклһнд туслһн» гидг көтлврин йовудт җил болһн насни дигт күрәд уга бичкдүд цаг зуур көдлмшәр теткгднә. Эдн амрлһна кемд күнд биш көдлмш кеҗ, мөңг олна. Нурһлҗ эдн сурһулин улд үүлддг лагерьмүдт, дегтрин саңд көдлнә, эргднк һазриг хог-богас цеврлнә, санлын самбрмудыг ширдҗ сәәхрүлнә, ветеранмудт социальн дөң күргнә.

Хальмг Таңһчин залврин Ахлачин дарук – таңһчин социальн делгрлтин, күч-көлснә болн көдлмшәр тетклһнә министр Өлзәтин Маринан келсәр, насни дигт күрәд уга бичкдүд амрлһна кемд көдләд, күч-көлснә халхар түрүн дамшлт хоршаҗ, олсн мөңгәрн сурһульднь кергтә эд-тавр хулдҗ авч чадна. 2024 җилин эклцәс авн мана таңһчд 309 күүкн-көвүн цаг зуур көдлмшәр теткгдв. Таңһчин әмтиг көдлмшәр теткллһнә цергллтин көдләчнр амрлһна кемиг тустаһар давулх саната бичкдүдт тааста көдлмш олҗ авхд дөң-тусан күргнә. Эн җил авъяст тохрсар, райодын сурһуль-эрдмин әңгүд, селәдин муниципальн бүрдәцс, шаңһа болн муниципальн үүлдврмүд болн арһлачнр көдлмшч орм сурһульчнрт йилһҗ өгв.
Элст балһсна олн салврта гимназин сурһульчнр өдрәр үүлддг лагерьт көдлҗәнә. 9-ч класс төгсәсн Окна Инесса үүрмүдтәһән вожатнр болҗ үүлдҗәнә, эдн бичкдүдлә олн зүсн наадд, марһас давулҗ, багшнрт дөң болна. Күүкнә келсәр, эдн өдр болһн хамгин түрүнд бичкдүдлә цогц-махмудан батрулна, дарунь өрүн хотан ууна. Өдр болһн ямр нег төрт нерәдгднә, тегәд терүнлә ирлцәтәһәр күүкд-көвүдлә күүндвр тогтагдна. Бичкдүд хамдан кинотеатрт одна, спортивн марһаст орлцна, билг-эрдмән делгрүлҗ сергҗмтәһәр амрна. Инесса түрүн болҗ сурһулин улд үүлдҗәддг лагерьт көдлҗәнә. Эн олсн мөңгәрн бийдән тааста хувц, сурһульднь кергтә эд-тавр хулдҗ авхар зуралҗана.
Зәрм күүкд-көвүд сурһулин дегтрин саңд көдлҗәнә. Үлгүрнь, Элст балһсна 4-ч тойгта дунд сурһулин күүкд-көвүд хуучрсн дегтрмүдиг ясҗ шинрүлв. Дегтрин саңгин көдләч Инесса Колушкинан зәңглсәр, тавн сурһульч өдрт хойр частан ирҗ көдлв. Ут тоодан эдн арвн өдртән көдлҗ, энүнд дөң болв. Эдн тәвц болһнд дегтрмүдиг дигләд, шора-тоосинь арчад, көдлмшән үнн-чик секдлтәһәр күцәв гиҗ Инесса Петровна буульҗ келв. Эн өдрмүдт багшнр сурһулин шин җилд олзлгдх дегтрмүд йилһҗ өгчәнә, тегәд дегтрин саңд көдлҗәдг сурһульчнр эднд бас дөңгән күргв.
Цаг зуур көдләд, мөңг олҗадг бичкдүд эк-эцкнртән дөң болх сана зүүһәд, амрлһна кемиг олзта-тустаһар давулҗана. Түрүн олсн мөңгән эдн эврә хәләцәр олзлҗ, күч-көлсн болһн чинртә болн дааврта болдгиг медҗ авхнь лавта.
ДООҖАН Наталья
ЗУРГТ: зуни амрлһнд көдлҗәдг сурһульчнр