Спортын биичнрин диилвр

Санкт-Петербург балһснд бииһин спортар нарт-делкән марһан болсмн. «DANCE MASTER CUP 2024» гиҗ тер нерәдгдлә.

Хальмгас терүнд орлцсн биичнр өөдән күцәмҗин спортын кемҗәнд сән аштаһар билгән үзүлв. «Империя DANCE» гидг бииһин спортивн клубд биичнр дамшлт авчана.
Даван Аюка болн Анастасия Алёхина юниормуд дунд болсн марһанд негдгч орм эзлв. Хойр номинацд эдн диилвр бәрв. «Латина D класс» болн «Сокращённое двоеборье D класс» гидг багд эднлә әдлцдгнь уга болв. Нань чигн халхар эдн билг-эрдмәрн ончрв.
Бадран Басң болн Увшин Юлда бичкдүд дунд болсн марһанд түрүн орм эзлв. «Стандарт» гидг багд мана бичкн биичнр һурвдгч ормд һарв.
Невиномысск балһснд Өмн үзгин кубокин төлә болсн марһанд Бадран Басң болн Увшин Юлда «Бичкдүд. Латиноамериканск көтлвр» гидг багд дииләчнрин нер зүүсмн. Спортивн бииһин халхар хальмг биичнр иигәд ик күцәмҗ бәрҗ йовна.
ҖИРҺЛИН Кермн