Хамдан – нег нутг

Билгтә бичкдүд дунд җилин туршарт олн-зүсн марһас бүрдәгднә. Шидр Элстд зургуд зурлһар бичкдүд дунд марһан болв. «Хамдан – нег нутг» гиҗ нерәдгдсн марһанд олн күүкд-көвүд орлцв.

Элст балһсна сурһулин бүрдәцсин сурһульчнр дунд тер марһан зарлгдла. Бичкдүдин садт ордг күүкд-көвүд марһанд шунҗ орлцснь соньн гих кергтә.
3-6 наста бичкн зурачнр дунд «Аленушка» гидг 34-ч тойгта бичкдүдин садт ордг Манҗин Буйнтан зург өөдәнәр үнлгдв. Марһанд 7-10 наста күүкд-көвүд дунд 15-ч тойгта дунд сурһулин сурһульч Румия Фейзиева негдгч орм эзлв. Дәкн нәәмн күүкн-көвүн марһана ашар ачлгдв.
Бичкн зурачнр эврәннь зургудтан өөрк һазран ямр кевәр үзҗәхән медүлҗ зурснь соньн болҗана. Бичкдүдиг тиигәд төрскн һазр-усндан дурта болҗ өсхднь иим марһас чигн туслх гисн ицлтәһәр таңһчин сурһуль-эрдмин болн номин министерствин көдләчнр тоолҗана.
ҖИРҺЛИН Кермн