Баһчуд-сурһмҗлачнрин җисән делгрҗәнә

Эндр Хальмг ик сурһульд таңһчин сурһульмудын болн зуни цагин лагерьмүдин төлә вожатнриг белдлһнә кергт ик оньган өгчәнә. Тер җисән нег цагт нам бүкл Әрәсәд темдгтә бәәсмн, орн-нутгин цуг регионмудас вожатнр Элстүр, Хальмг ик сурһульд ирҗ дамшлт авчала. Тер җисәг доцент, педагог номин кандидат «Әрәсән оютнрин багмудын» (РСО) баһчудын олна бүрдәцин Хальмг әңгин һардач Даван Санл кесг җилин туршарт чадмгар һардҗана, түүнә нилчәр багшнрин, тосхачнрин, селәнә эдл-ахун көдләчнрин оютнрин багмудт ордг баһчудын то җил ирвәс өсәд йовна.

Эн 2024 җил чигн Б.Б.Городовиковин нертә Хальмг ик сурһуль РСО-н Хальмг әңглә хамдан төсвин дииләчнр болв. Тиим кевәр эдн оютнрин багмудын орлцачнрт көдлмшч эрдм дасхх зөв авв. Тер тоод 200 оютн «Вожатый» гидг эрдмәр мергҗлин белдвр өглһнә көтлврәр хойр сардан дасв.
Тиим кевәр таңһчин ик сурһулин болн 7 колледжин оютнр мергҗлтән өөдлүлҗ вожатын эрдмд кергтә олн тоотыг дасв. Тер тоод Хальмг ик сурһулин, Москван шаңһа гуманитарн-экономикин ик сурһулин, Элстин багшин колледжин, Т. Хахлынован нертә Хальмг эмнлһнә колледжин, Элстин политехникин колледжин, Хулд-гүүлгәнә – технологин колледжин, Әрәсән социальн технологийин шаңһа ик сурһулин Хальмг әңгин, Ф.Г. Поповин нертә Башантан колледжин (Хальмг ик сурһулин әңг) оютнр сурһулян төгсәв.
Эдн күүкдин насна онц тоотыг, вожатын үүлдврт кергтә медрлиг, бичкдүдин цаг зуурин коллективиг, цуг селгәг бүрдәлһнә зокалын, багин үүлдвриг тогталһна эв-арһиг болн нань чигн соньн тоотыг дасч авв. Тер медрл вожатнрт кергтә болхнь лавта, тегәд оютнр ик оньган өгч шин тоотыг дасв.
Оютнрин багшнрин багин гешүд Хальмг ик сурһулин багшнрт эврә сурвран өгәд, күнд бәәдл тогтхла вожатый күн ямаран үүлдвр күцәх зөвтән тускар тоолврарн хувалцҗала, педагогин болн психологин олн тоотыг дасч терүг онц йовдлд яһҗ олзлхин тускар дамшлт авв. Тиим кевәр эн көтлврәр оютнр вожатый күүнд кергтә кесг тоотыг дасч терүг селгәнә йовудт яһҗ олзлҗ болхинь йилһҗ авв.
«Цуг тер тоотыг би сәәнәр дасв, вожатын көдлмшт тернь нанд эрк биш кергтә болх гиҗ санҗанав. Хальмг ик сурһулин багшнрт ик ханлтан өргҗәнәв. Йирдән би юрист болхар бәәнәв, Элстин политехникин колледжд дасчанав. Болв нанд нег дү, кесг үйнр-бөлнр бәәнә, теднлә күүнднәв, сурһуль даслһнд нөкд болнав. Тиим кевәр нанд педагогин дамшлт невчк бәәнә гиҗ санҗанав. Тегәд мана тал Санл Алексеевич ирәд, вожатын эрдмин тускар келҗ өгхлә, нанд тернь таасгдв. Тиигәд ода сурһулян сурад, удл уга Джубга селәнд Хар теңгсин көвәд бәәдг «Морская волна» лагерьт экләд көдлхв. Тиим көдлмш нанд таасгдҗана, цаган чигн тустаһар Хар теңгсин көвәд давулхв», – гиҗ Элстин политехникин колледжин оютн Акугинә Дмитрий эврә иргч көдлмшин тускар келнә.
Тавдгч селгәндән Дмитрий көдлх, һаха сарин чилгчәр Элстүр ирҗ сурһулян цааранднь сурх. Вожатын көдлмш тааста, күцәмҗтә болтха гиҗ бидн энүнд дурдҗанавидн. Сурһулян төгсәснә хөөн Хальмг ик сурһулин болн колледжмүдин оютнр Краснодарин крайин Джубга селәнд ирҗ «Морская волна» лагерьт дамшлһ кев. Тер кем Дмитрийд таасгдад лагерьт көдлх шиидвр авснь лавта. Һурвн өдртән эдн лагерьт медрлән, эв-дован олзлв, тер цагнь тустаһар болн соньнар давв. Тегәд ода баһчуд авсн медрлән болн хоршасн дамшлтан олзлхар белн бәәнә.
Хөннь Хальмг ик сурһульд педагогин багин оютнрт вузин сурһуль-эрдмин заллтын һардач Конуша Алдр вожатын эрдм дассна туск герч цаас байрин бәәдлд бәрүлҗ өгв.
Оютнрин багин шунлтта орлцач, СПО-н дацңгин оютн Бадмин Данзн бас тоолврарн хувалцҗ, Хальмг ик сурһулин һардврт болн багшнрт гүн медрл авсндан ханлтан өргв. Сурһулян сурсн кемд талдан колледжмүдин көвүд-күүкдлә таньлдҗ теднлә сән үүрмүд болв. Цуг оютнрт багмудын ханьд орҗ вожатын эрдм дасч цаган тустаһар давултн, гиҗ Данзн тоолвран келв.
Тиим кевәр уйн наста вожатнр Хальмг Таңһчин, Хар теңгсин болн нань чигн лагерьмүдт ик чинртә көдлмшән эклх, тер үүлдврнь күцәмҗтә, амрлһнь сән таалта болтха, теднә сурһмҗд орсн көвүд-күүкднь вожатнран күндлтхә гиҗ дурдҗанавидн.

ТҮРВӘН Һуна